Ыңғай күрһәткестәрҙе һаҡлау мөһим

Бөрйән районында Һаулыҡ һаҡлау министрлығы коллегияһының күсмә ултырышы үтте. Көн тәртибендә – һаулыҡ һаҡлау системаһының 2025 йылдың тәүге яртыһындағы эш һөҙөмтәһе. Сарала Башҡортостан Хөкүмәте Премьер-министрының беренсе урынбаҫары Урал Килсенбаев, Хөкүмәттең Һаулыҡ һаҡлау һәм фармация директоры Динар Вәлиуллин, һаулыҡ һаҡлау министры Айрат Рәхмәтуллин һәм башҡа ведомство етәкселәре, медицина учреждениеларының баш табиптары ҡатнашты. –Республикала Башҡортостан Башлығы Радий Хәбировтың ҙур иғтибар биреүе һөҙөмтәһендә фельдшер-акушерлыҡ пункттарын яңыртыу буйынса мөһим эш бара. Башҡортостан Волга буйы федераль округында модулле ФАП-тар урынлаштырыу буйынса лидерлыҡты тота. 2021 йылдан алып республикала 361 ФАП төҙөлдө, был Волга буйы федераль округында яңыртылған медицина пункттарының яртыһынан күбеһен тәшкил итә. 2025 йылда республика тағы ла алты поликлиника һәм 134 модулле медицина учреждениеһын аласаҡ. Шулай уҡ туғыҙ һаулыҡ һаҡлау объектына капиталь ремонт үткәреү планлаштырыла, – тип билдәләне Урал Килсенбаев. 2025 йылдан республикала яңы “Оҙайлы һәм әүҙем тормош” милли проекты старт алды. Тап ошо мөһим милли проект 2030 йылға көтөлгән ғүмер оҙайлығын 78 йәшкә (артабан 80 йәшкә) тиклем еткереүҙе күҙ уңында тота. –Беҙҙең бөтә эшебеҙ, тормошҡа ашырылыусы проекттар милли маҡсатыбыҙға килтерергә тейеш. Быға халыҡ үлемен кәметеү иҫәбенә ирешергә мөмкин. Үлемдең дөйөм күрһәткесе үткән йылдың ошо осоро менән сағыштырғанда биш процентҡа кәмене, сабыйҙар үлеме күрһәткесе – ун процентҡа, хеҙмәткә һәләтле йәштәге халыҡтың үлем күрһәткесе – 9,5 процентҡа. Хәҙер йыл аҙағына тиклем был ыңғай күрһәткестәрҙе һаҡлау бик мөһим, – тине һаулыҡ һаҡлау министры Айрат Рәхмәтуллин. Йоғошһоҙ хроник сирҙәрҙе иртә асыҡлау буйынса төп ҡорал булып диспансерлаштырыу һәм медицина тикшереүҙәре иҫәпләнә. Ярты йыл эсендә 971 мең кеше тикшереү үткән. Йыл да үтеүсе “Сәләмәт республика – сәләмәт төбәк” акцияһы 157 тораҡ халҡын йәлеп итәсәк. Фото: Һаулыҡ һаҡлау министрлығының матбуғат хеҙмәте.