🎼Ураджэнец Гродзеншчыны, выбітны беларускі оперны спявак, які праславіўся на сусветных сцэнах і не забываў родныя мелодыі нават за акіянам.
🪽 14 ліпеня 1994 года памёр Пётр Конюх.
👼 Нарадзіўся 8 сакавіка 1910 года, у вёсцы Турэц (сёння 🪻 Карэліцкі раён Гродзенскай вобласці). Да вайны працаваў у Баранавічах, а ў 1938 годзе скончыў сельскагаспадарчыя курсы ў Вілейцы.
🏹 Другая сусветная вайна заспела яго ў Ржэве, дзе ён вучыўся на льнаводчых курсах. Пасля трапіў у Другі польскі корпус генерала Андэрса і ваяваў з нацызмам у Паўночнай Афрыцы і Паўднёвай Еўропе. Удзельнічаў у бітве пры Монтэ-Касіна (1944), дзе быў цяжка паранены і адзначаны італьянскімі ордэнамі і памятным Крыжам «За Монтэ-Касіна».
🇮🇹 Пасля вайны застаўся ў Італіі, дзе атрымаў ваенную стыпендыю і скончыў Рымскую акадэмію мастацтваў (1951) з дыпломамі спявака і маэстра. Выступаў на сцэнах Еўропы і свету, спяваў на беларускай, італьянскай, польскай, французскай, англійскай, нямецкай, рускай і ўкраінскай мовах.
🇺🇸 У 1950 годзе пераехаў у ЗША, дзе не толькі выступаў, але і выкладаў вакал. Беларускія песні заўсёды займалі асаблівае месца ў яго рэпертуары – сучаснікі адзначалі, што асабліва пранікнёна ён выконваў «Палыночак».
🏆У 1957 годзе перамог на Міжнародным конкурсе вакалістаў у Рыме. Пазней адкрыў уласныя вакальныя школы ў Гамбургу і Нью-Ёрку і дапамагаў ставіць голас беларускім выканаўцам, у тым ліку Данчыку.
🎼 У яго выкананні былі запісаны на кружэлкі і беларускія песні, у тым ліку і «Магутны Божа».
👍 У 1975 годзе наведаў Беларусь, дзе сустракаўся і засябраваў з Рыгорам Шырмай, Янкам Брылём і іншымі дзеячамі культуры.
Пахаваны на беларускіх могілках у Іст-Брансвіку, штат Нью-Джэрсі, ЗША.
📽 У 2009 годзе «Беларусьфільм» зняў дакументальны фільм пра яго жыццё і творчасць.
🌱 Слухаем разам #музыканаhrodnalife ⬇️
«Magutny Bozha». Piotr Koniuch. Bass. USA
