Иосиф Кукушкин: «Чире вăхăтра тупса сиплемелле»
Çӗпрел районӗнче Кукушкинсене пӗлменнисем сахал. Мӗншӗн тесен чăнах та хисепе тивӗç çемье вăл. Тутарстан Республикин тава тивӗçлӗ тухтăрӗ Иосиф Виссарионович Çӗпрел районӗн сывлăх сыхлав системине пысăк тӳпе кӗртнӗ çын.
Мăшăрӗпе Ирина Алексеевнăпа (Апас районӗнчи Черккӗн ял хӗрӗ) нумай çул килӗштерсе пурăнаççӗ. Икӗ ывăл çуратса ӳстернӗ вӗсем. Ывăлӗсем ашшӗ пекех медицина профессине суйланă, хирургсем. Асли Андрей Республикăн клиника больницин кăкăрти органсен хирургийӗн (торакальная хирургия) уйрăмне ертсе пырать, кӗçӗнни Станислав Хусанти 18-мӗш больницăн тухтăрӗ, кунтах Андрейӗн мăшăрӗ те реабилитологра тăрăшать. Иосиф Вассарионович хăйӗн çемье пурнăçӗ ăннăшăн чăн малтан мăшăрне Ирина Алексеевнăна ăшшăн тав тăвать, кунӗн-çӗрӗн ӗçре чух çемье ун çинче-çке тата çывăх çыннин тӗревӗсӗр профессире те çитӗнӳ тума çăмăлах пулмастчӗ-тӗр.
