Дошмандар йоҡламай...

Уҙған аҙнала социаль селтәрҙәрҙә Башҡортостан Башлығы Радий Хәбиров менән видеоролик таратылды. Унда республика Башлығы, имеш, ветеринар табиптарға мөрәжәғәт итә. “Фактчекинг по-башкирски” телеграм-каналы дөрөҫлөктө асыҡланы. Был видео тулыһынса нейроселтәр менән эшләнгән һәм ысынбарлыҡ менән бер ниндәй ҙә уртаҡлығы юҡ. Республика Башлығынан ветеринарҙарға бер ниндәй ҙә белдереүҙәр булманы. Радий Хәбировтың сәхифәһендә 2025 йылдың 18 мартындағы оригинал видео бар. Унда “Приоритет 2030” стратегик академик лидерлыҡ программаһы тураһында һүҙ бара. Был - ЦИПСО-ның сираттағы фейкы, ул беҙгә мәғлүмәт донъяһында дөрөҫлөктө уйҙырманан айыра белеү мөһим икәнен иҫебеҙгә төшөрә. “Аспекты” телеграм-каналы, Башҡортостан Республикаһының Контроль-иҫәп палатаһы рәйесе Константин Шаһиморатовтың отставкаға китеүе хаҡында хәбәр итте. Ләкин авторҙар икенсе элекке рәйес – Рәмил Исҡужиндың фотоһын файҙаланған. Таныш сюжет, шулай бит? Хәтерегеҙгә төшөрәбеҙ, быға тиклем Рәмил Рәхмәтов та ошондай хәлгә ҡалғайны, ул самолетта, фотоларҙа Булушевты Клебанов менән бутап, булмаған министрҙарҙы “осрата”. Рәхмәтов “Аспекттарға” нимә булған? Рәхмәтов уларға консультация бирәме? Йәки был яңы редакция сәйәсәтеме – “беренсе булып баҫтырабыҙ, бер ҡасан да тикшермәйбеҙ”? Әйткәндәй, Константин Шаһиморатовтың эшенән китеп, яңы урынға урынлашыуы тураһында “Уфимский визионер” телеграм-каналы ла яҙҙы. Улар фекеренсә, уның республика Контроль-иҫәп палатаһы рәйесе вазифаһынан БР Башлығының Дәүләт Йыйылышы – Ҡоролтайҙағы тулы хоҡуҡлы вәкиле итеп күсеүе Рәсәй Президент аппаратының сәйәси амбициялары һәм бурыстары менән бәйле булыуы мөмкин. Константин Шаһиморатовтың отставкаһы көтөлмәгән кеүек күренһә лә, айырыуса республикала һәм Волга буйы федераль округында уның эшмәкәрлеген юғары баһалауҙарын иҫәпкә алғанда, ул 2026 йылдың мөһим Дума һайлау кампанияһын әҙерләү логикаһына тап килә. Шаһиморатовтың партия эшендә тәжрибәһе ҙур – 2008 йылдан ул "Ғәҙел Рәсәй" төбәк бүлексәһе менән етәкселек итә, шуға күрә уға сифатлы һайлау кампанияһына алмашҡа депутат креслоһы менән перспективалы вариант тәҡдим итәләр тип фаразларға була. Был йәһәттән уның Башҡортостан Башлығының Ҡоролтайҙағы тулы хоҡуҡлы вәкиле итеп тәғәйенләнеүе ваҡытлыса сара булып күренә. Бөгөн республиканан ғәмәлдәге депутаттарҙың ҡайһыһы ротацияға эләгәсәген күҙаллау ҡыйын булһа ла, алмаштырыуҙар буласаҡ тип ышаныс менән әйтергә мөмкин. Һәр хәлдә, әле республикала Дәүләт Думаһына депутатлыҡҡа кандидаттар эҙләү әүҙем бара. Һәм бында республикаға тәжрибәле кешеләр кәрәк буласаҡ. Шаһиморатов - уларҙың береһе. Икенсе һорау – Шаһиморатов партиянан барырмы, әллә үҙен үҙе күрһәтерме? Бөгөн “Ғәҙел Рәсәй”ҙең төбәк бүлексәһе ниндәй хәлдә булыуын күреп һәм реаль электораль бушлыҡ булмауын иҫәпкә алып, Константин Шаһиморатовтың был партиянан кандидатураһын күрһәтеү сәйәси яҡтан үҙ-үҙенә ҡул һалыу тип ҡарарға мөмкин. Әммә төбәктәге КПРФ-тың етди конфликты, ЛДПР-ҙағы ауыр үҙгәртеп ҡороу шарттарында, “Ғәҙел Рәсәй”ҙең үҙ кешеһен округтарҙың береһендә, бигерәк тә Башлыҡ Хакимиәтенең эске сәйәси блогы ярҙамында үткәреү мөмкинлеге бар. БР Башлығының Константин Шаһиморатовҡа ҡарата мөнәсәбәтен белеп, уға ҡамасауламаясаҡтар, тип ышаныс менән әйтергә мөмкин.