Жыргалан, Ак-Булак жана Боз-Учук чокуларына курулуп жаткан "Ала-Тоо Резорт" лыжа базасы Кыргызстанда туризмди өнүктүрүп, жылына 2 млн туристти кабыл алып, 5 миң жумуш ордун түзөт деп күтүлүүдө.
🌄 Иссык-Көл облусунда жайгашкан Жыргалан, Ак-Булак жана Боз-Учук чокуларында “Ала-Тоо Резорт” аттуу жаңы тоо лыжа курорту курулууда. Бул курорт Борбордук Азиядагы эң ири курорттордун катарына кирип, жыл бою конокторду кабыл ала алат. Анын ачылышы Кыргызстандын кооз табиятын дүйнө жүзүнө таанытууга чоң салым кошот.
🔧 “Ала-Тоо Резорт” комплексин куруу үчүн 4 миң гектар жер бирдей аталыштагы мамлекеттик ишкананын карамагына берилген. Биринчи этапта “Жыргалан” курортунун курулушу 2026-жылдын кыш мезгилине чейин бүтөт деп пландалууда. Учурда курортко жол салуу иштери жүрүп жатат, электр линиясы мурунтан эле тартылган.
🚠 Австриялык компания 4 чакырым узундуктагы канат жолдун курулушун баштоого даярданып жатат. Канат жолдун жабдуулары Австриядагы заводдон этап-этабы менен жеткирилет. “Жыргалан” туристтик шаарчасында 58 гектар аянтты ээлеген объекттердин курулушуна аукцион өткөрүлөт.
⛷️ “Ак-Булак” курортунун ачылышы 2027-жылга, ал эми “Боз-Учук” курортунун ачылышы 2028-жылга пландалган. Курорттун жалпы трассалары 250 чакырымды түзүп, үч тоо бирдиктүү тармакка бириктирилет.
🏨 Туристтик шаарчаларда 5, 4 жана 3 жылдыздуу мейманканалар, коттедждер, глэмпингдер, SPA-комплекс, этно-шаарча жана башка көптөгөн объекттер курулат. Бул долбоор ишке ашкандан кийин 5 миң жумуш орду түзүлөт.
💼 Долбоор ишке киргенде өлкөнүн бюджетине жылына 146 миллион евро салык түшүшү күтүлүүдө. Курорт жыл сайын дүйнөнүн ар тарабынан 2 миллиондон ашуун туристти кабыл алат деп болжолдонууда. “Ала-Тоо Резорт” Кыргызстандын экономикасына олуттуу салым кошуп, Кумтор сыяктуу кирешелүү ишканага айланат.