Улар иленең ысын һаҡсыһы буласаҡ

16 – 21 июлдә Башҡортостанда “Зарница 2.0” уйындары округ йыйындары булды. Сара Рәсәй Федерацияһы Геройы Максим Серафимов исемендәге “Патриот” хәрби-патриотик паркы биләмәһендә үткәрелде. Йыйынға Волга буйы федераль округы дөйөм белем биреү ойошмаларының 14 – 17 йәшлек уҡыусылары килде. Сара программаһының өлкән йәш категорияһындағы 14 отряд — Бөтә Рәсәй “Зарница 2.0” хәрби-патриотик уйынының төбәк этаптары еңеүселәре – ҡатнашты. Һәр отрядтың составында 11-12 кеше, шул иҫәптән ике ҡыҙ һәм бер-ике педагог-уҡытыусы бар ине. Стәрлетамаҡтан “РОСГВАРДИЯ БР” командаһы Башҡортостан исеменән ҡатнашты. Улар ярыштарҙың төбәк этабында өлкән йәш категорияһында беренсе урын яулағайны. Йыйындар программаһының төп йүнәлештәре ут, тактик һәм махсус әҙерлек, урында ориентир табыу, беренсе ярҙам күрһәтеү, һуғышта отряд менән идара итеү, позицияларҙы инженер ҡорамалдары менән йыһазландырыу, алынған белемде ҡулланып яланда сығыш яһау булды. Сара ысын хәрби хәрәкәттәр шарттарына тура килтерелгән уҡыу-күнекмә процесы форматында ойошторолдо. Был иһә лидерлыҡ сифаттарын, дисциплинаны, яуаплылыҡты һәм команда рухын үҫтереүгә булышлыҡ итә. Йыйындарҙы ойоштороусылар – Бөтә Рәсәй “Беренселәр хәрәкәте” балалар һәм йәштәр ижтимағи-дәүләт хәрәкәте һәм Бөтә Рәсәй “ЮНАРМИЯ” балалар-үҫмерҙәр хәрби-патриотик йәмәғәт хәрәкәте. 20 июлдә сараны ябыу тантанаһында округ йыйындарында ҡатнашыусылар алдында ҡунаҡтар – Бөтә Рәсәй “ЮНАРМИЯ” балалар-үҫмерҙәр хәрби-патриотик йәмәғәт хәрәкәте хәрби-патриотик уйындар дирекцияһы етәксеһе Александр Неверов, Башҡортостан Республикаһының Махсус хәрби операцияла ҡатнашыусылар ассоциацияһы рәйесе Оскар Ситдиҡов, Бөтә Рәсәй “Беренселәр хәрәкәте” балалар һәм йәштәр ижтимағи-дәүләт хәрәкәтенең төбәк бүлексәһе советы рәйесе Ранис Хәсәнов сығыш яһаны. - Быйыл Башҡортостан тотош округ йәштәре өсөн йыйылыу урынына әүерелде. Бында һәр кем үҙенең күнекмәләрен һәм илһөйәрлек рухын нығытырға тырыша. Йыйындарҙа балалар тактик әҙерлек, беренсе ярҙам күрһәтеү нигеҙҙәренә өйрәнеп кенә ҡалманы, шулай уҡ мөһим тормош ғәмәлдәренә төшөндө. Улар иленең ысын һаҡсыһы була ала. Маҡсатыбыҙ – ошондай проекттарҙы үҫтереү һәм уларға булышлыҡ итеү. Тап уларҙа илебеҙҙең киләсәге нигеҙҙәре һалына, - тине Ранис Хәсәнов. “Росгвардия БР” командаһы ҡатнашыусыһы Иван Гончарук үҙ уй-тәьҫораттары менән уртаҡлашты. - Тыуған еребеҙҙә үткәрелгән округ йыйындарының бер өлөшө булыуы оҡшаны. Уны үткәргән ваҡытта күп кенә файҙалы ғәмәлдәргә һәм уларҙы иң кәрәкле ваҡытта файҙаланырға өйрәндек. Зарница илһөйәрлек, тыуған илгә һөйөү кеүек төшөнсәләрҙе ысынлап тойорға булышлыҡ итә, - тине Иван Гончарук. Йыйындар һөҙөмтәһе буйынса, башланғыс хәрби әҙерлек ғәмәлдәре барлыҡҡа килде, илһөйәрлек, рухи ҡиммәттәр, шул иҫәптән Тыуған илгә ҡәҙер тойғоһо тәрбиәләнде. Сығанаҡ, фото: “Беренселәр хәрәкәте”.