Һәләк булғандар – ағалы-һеңлеле...

Ялдарҙа Ишембай районында ҡот осҡос авария булды: биш йәш кеше ултырған автомобиль түңкәрелде. Һөҙөмтәлә икәүһенең ғүмере өҙөлдө, ҡалғандары ауыр йәрәхәттәр алды. “КП-Өфө” баҫмаһы уларҙың кемлеген асыҡлаған. Шәмбе төндә биш йәш кеше райондың Васильевка ауылында осраша. Уларҙың иң өлкәненә – 23, ә бәләкәйенә 16 ғына йәш була. Йәштәр клубҡа бара, ләкин ул ябыҡ булып сыға. Улар күрше ауыл клубына барырға ҡарар итә, тик уныһы ла бикле булып сыға. Шул саҡта йәштәр Маҡар ауылы янына барырға ҡарар итә. Бында йәштәр йөрөргә яратҡан ҡарау майҙансығына юллана улар. Баҫма хәбәр итеүенсә, улар иҫерткес эсемләктәр ала һәм 23 йәшлек водитель идара иткән “Опель Астра”ға ултырып юлға сыға. Әйткәндәй, юл әллә ни оҙон да булмай, бер нисә минутта барып етерлек, ләкин фажиғә өсөн ул да етә... Авария Стәрлетамаҡ – Белорет – Магнитогорск трассаһының 52-се километрында була. Шәп китеп барған рулдәге егет идараны юғалта һәм машина юлдан ситкә осоп, бер нисә тапҡыр түңкәрелә. 16 йәшлек ҡыҙ урында йән бирә. Табиптар ҡалған йәштәрҙе дауаханаға алып китә. Унда барып еткәс, реанимация бүлексәһендә 18 йәшлек егет күҙҙәрен мәңгегә йома. Һуңғараҡ асыҡланыуынса, һәләк булған егет менән ҡыҙ ике туғандар булған. Улар Ишембай нефть колледжында белем алған, ҡыҙ – беренсе, егет икенсе курсты тамамлаған. – Улар икеһе лә бик һәйбәт дуҫтар ине. Инде йәшәй генә башлаған саҡтары... Һәр саҡ ярҙам иттеләр, ихлас күңелле булдылар. Улар мәңгегә беҙҙең йөрәктәрҙә ҡалыр, – тигән йәштәрҙең әхирәте. Ҡалғандарға килгәндә, водитель егет менән уның 20 йәшлек һеңлеһен операцияға әҙерләйҙәр. Авариянан һуң үҙенә килгән бишенсе ҡыҙ аяғын ҡыбырлата алмай. Ул был фажиғәлә яҡын әхирәтен һәм һөйгән егетен юғалтҡан, шуға әлегә тыныслана алмай илай. Уның күп кенә урындары һынған, ҡыҙҙы оҙайлы реабилитация көтә. Таныштары әйтеүенсә, рулдәге егет юл хәрәкәте ҡағиҙәләрен боҙғаны өсөн водитель таныҡлығын алдыртҡан булған. Шулай уҡ ул эскән килеш рулгә ултырған тигән фараз да бар. Әлегә бының буйынса рәсми яуап юҡ. Ләкин, нисек кенә булмаһын, ике кеше ғүмере өҙөлгән авария өсөн уны енәйәт яуаплылығы көтә. Авария буйынса тикшереү дауам итә, прокуратура уны үҙ контроленә алған. Фото: "КП-Өфө".