Ирем һәр саҡ эргәмдә булды, уға ҙур рәхмәт

Ғаилә “Ата-әсә ҡаһарманлығы” миҙалына лайыҡ булды Башҡортостан Башлығы ошо көндәрҙә республиканың дүрт ғаиләһен “Ата-әсә ҡаһарманлығы” миҙалы менән наградлау тураһындағы Указға ҡул ҡуйҙы. Ошо маҡтауға лайыҡ ғаиләләр араһында Туймазынан Зөлфиә һәм Марат Дәүләтовтар ғаиләһе лә бар. Наградаларҙы 11 июлдә Бөрө ҡалаһында “Ғаилә, мөхәббәт һәм тоғролоҡ көнө”нә арналған республика фестивалендә тапшырасаҡтар. Зөлфиә – Өфө ҡыҙы. Бала сағында каникул ваҡытында Балтай ауылына ҡунаҡҡа килергә ярата. Күңелсәк, аралашыусан туғыҙ йәшлек ҡыҙ һәр һүҙен уйлап һөйләүсән, аҡыллы 11 йәшлек Марат менән танышып, дуҫлашып китә, бергәләп уйнайҙар. Яҙмыш уларҙы бер нисә йылға айырһа ла, йәштәрҙең дуҫлығы өҙөлмәй. Зөлфиә Хабаровск ҡалаһына эшкә китә, ә егет – хәрби хеҙмәткә. Йәштәр 1990 йылда өйләнешеп, Мараттың ата-әсәһе менән бергә Балтайҙа йәшәй башлай. Бер-бер артлы балалар донъяға килә: Лидия, Илфат, игеҙәктәр Илшат һәм Ришат. Марат Низаметдин улы мәктәптә уҡыта, Зөлфиә Шамил ҡыҙы колхозда, почтала, магазинда эшләй. Иркен йорт һалып инәләр. Балалар бер-бер артлы үҫеп, ҡанат нығытып, үҙаллы йәшәй башлай. Лидия тормошта, юрист булып эшләй. Илфат нефть компанияһында белгес, Илшат вахта ысулы менән Себерҙә, Ришат IT-белгес булып хеҙмәт итә. Ғаиләлә бишенсе сабый тыуғанда Зөлфиә Шамил ҡыҙына 42 йәш тулған була. “Балалар үҫкәндә беҙ күп эшләй инек, йорт һалдыҡ. Балаларҙы рәхәтләнеп, һөйөп үҫтерергә мөмкинлек аҙ булды. Шуға күрә Илназдың тыуыуы беҙҙең өсөн ҙур бүләк ине", – тип хәтерләй әсә. Ул саҡта опека хеҙмәтендә эшләгән ҡыҙҙары Лидия әсәһенә имен булмаған ғаиләнән алты йәшлек ҡыҙҙы тартып алырға мәжбүр булыуҙары тураһында һөйләй. Әсәнең был сабыйҙы уйлап йөрәге һыҙлана, түҙмәйенсә, ире менән һөйләшеп, ҡыҙҙы тәрбиәгә алырға булалар. Шулай итеп, ғаиләлә Милена, аҙаҡ ете йәшлек Фәнилә тигән ҡыҙҙар барлыҡҡа килә. Хәҙер инде уларға 19-ар йәш. Икеһе лә студенттар. 2021 йылдың йәйендә электр тогына һуғылып, ике ҡулынан да яҙған Илназдың фажиғәһе ғаиләнең тормошон икегә бүлә. Бергәләп улар был ауыр хәлде лә кисерергә көс табалар. Илназ хәҙер 7-се класты тамамланы. Ул – терәк-хәрәкәт аппараты зарарланған спортсылар араһында еңел атлетика буйынса ете тапҡыр Рәсәй чемпионы, район һәм республика ярыштары призеры. – Маратҡа миңә ҡарағанда ла бәләне кисереү ауыр ине, мин илай, зарлана алам, ә ир-ат хис-тойғоларын төпкә йәшерә. Һәр ғаилә лә бындай ҙур һынауҙы күтәрә алмай, һыныуҙары ихтимал. Ә беҙ еңә алдыҡ. Ирем һәр саҡ эргәмдә булды, уға ҙур рәхмәт. Беҙ үҙебеҙҙең миҫалда, ниндәй генә ауырлыҡтарға юлығыуға ҡарамаҫтан, тормоштоң дауам итеүен раҫларға, ауыр хәлдәргә тарығандарға ярҙам итергә тырышабыҙ, – ти Зөлфиә Шамил ҡыҙы. Фото:”Про Туймазы” сайты.