Эшселәрҙең һаулығы мөһим

Башҡортостанда төбәк предприятиелары белгестәренең сәнәғәт диспансеризацияһын дауам итәләр. Башланғыстың төп маҡсаты – эш урындарында медицина ярҙамы күрһәтеү мөмкинлеген тәьмин итеү. Был хаҡта Хөкүмәттең аҙналыҡ оператив кәңәшмәһендә һаулыҡ һаҡлау министры Айрат Рәхмәтуллин хәбәр итте. – Диспансеризация сиктәрендә өлкәндәргә профилактик һәм периодик медицина тикшереүе, шулай уҡ предприятиеларҙа диспансер күҙәтеүе үткәрәбеҙ, – тине Айрат Рәхмәтуллин. Бындай тикшереүҙәрҙе киңәйтеү өсөн төбәктә кәрәкле ҡорамалдар менән йыһазландырылған алты күсмә медицина комплексы һатып алынған. 2024 йылда Өфөлә 13-сө ҡала клиник дауаханаһы базаһында Сәнәғәт медицинаһы үҙәге булдырыла. Уның структураһына медицина профилактикаһы, терапия бүлексәләре, шулай уҡ һаулыҡ һаҡлау пункттары инә. Ярҙамсы хеҙмәттәр ҙә бар – нур диагностикаһы, функциональ һәм эндоскопия бүлексәләре. Тикшереүҙәрҙе бөтә профилле табиптар үткәрә. – Сәнәғәт медицинаһы үҙәге эшләүсе халыҡта ауырыуҙарҙы иртә асыҡлауҙың һөҙөмтәле ҡоралы булараҡ үҙен күрһәтте лә инде, – тине һаулыҡ һаҡлау министры. – Был проектты илдең башҡа төбәктәре лә тарата. 2025 йылда бөтәһе 162 мең самаһы эшсене тикшереү планлаштырыла. Мәҫәлән, биш ай эсендә 68 меңдән ашыу кеше тикшерелгән. Диспансеризация йомғаҡтары буйынса тикшерелгәндәрҙең 19,2 проценты диспансер күҙәтеүенә дусар ителә. Иң йыш осраған ауырыуҙар: гипертония ауырыуы һәм нервы системаһы ауырыуҙары. Шулай уҡ күп пациенттарҙа диабет алды һәм холестериндың юғары кимәле кеүек хәүеф факторҙары асыҡланған. Был йүнәлеште артабан камиллаштырыу өсөн республикала бер нисә сараны тормошҡа ашырырға планлаштыралар. Улар иҫәбендә – эш биреүселәр һәм хеҙмәткәрҙәр өсөн мәғлүмәт кампаниялары үткәреү, мотлаҡ медицина страховкаһы буйынса медицина хеҙмәттәренә инеүҙе ябайлаштырыу, һанлы сервистарҙы ҡулланыуҙы киңәйтеү, шулай уҡ махсуслаштырылған комплекслы медицина хеҙмәтләндереү үҙәктәрен булдырыу. Фото: Башҡортостан Башлығы сайты.