Киләсәктә лә хәрби юлдан китмәксе

Ҡыйынлыҡтарға һынмаған, ауырлыҡтарға зарланмаған ир-егеттәр һәр ҡайһыбыҙҙа ла һоҡланыу, ғорурланыу уята. Ундайҙар ауыр саҡта иленең дә ҡалҡанына әүерелә. Бөгөнгө геройым, махсус хәрби операцияла ҡатнашыусы “Арматура” позывнойлы яугир Учалы районының бәләкәй генә Буранғол ауылынан. Ул 31-се “Башҡортостан” полкында хеҙмәт итә. Үҙенә 23 йәш кенә булыуға ҡарамаҫтан, ундағы ныҡлыҡҡа, ихтыяр көсөнә ғәжәп итерлек. Әйткәндәй, был ауылдан ете егет махсус хәрби операцияға юлланған. “Арматура” бала сағынан спорт менән шөғөлләнеп, физик яҡтан көслө булып үҫә. Саңғыла ла уҙыша, еңел атлетика менән дә шөғөлләнә, ярыштарҙа ла ҡатнаша. Ваҡыты еткәс, һалдат бурысын үтәргә армияға юллана. Махсус хәрби операция башланғас, ситтә тороп ҡала алмай, 2023 йылдың июнендә үҙ ирке менән контракт буйынса хәрби хеҙмәткә юллана. – Бала саҡтан үҙ илемдең патриоты булып үҫтем. Минең махсус хәрби операцияға барырға тигән ҡарарымды яҡындарым, атай-әсәйем дә аңлап, ғорурлыҡ менән ҡабул итте. Улар яғынан һәр ваҡыт терәк-таяныс тоям. Атайымдың “Улым, бирешмә, түҙемле бул. Иҫән-һау йөрөп ҡайт” тигән һүҙе лә көс-ҡеүәт өҫтәне, – тине хәҙер инде ике йыл махсус хәрби операцияла хеҙмәт итеүсе яугир. Ялға ҡайтыуы беренсегә түгел. Шулай ҙа һәр ваҡыт ҙур ашҡыныу менән йәнтөйәгенә ҡайта. – Ситтә йөрөгәндә тыуған ауыл, тыуған ер бик һағындыра, йыш иҫкә төшә. Ауылымда һалдаттарға ҡарата ҙур ихтирам һәр ерҙә тойола. Хөрмәтләп ҡаршы алалар, осрашыуҙарға саҡыралар, күстәнәстәр менән изге теләктәрен әйтеп оҙатып ҡалалар. Гуманитар ярҙам яғынан да учалыларға рәхмәт. Тылдан ярҙам тойоу беҙгә көс өҫтәй. Ошондай ныҡлы тыл булмаһа, беҙгә лә ауырға төшөр ине. Бергәләп еңеүҙе яҡынайтабыҙ,– ти һалдат. “Арматура” позывнойлы егет, йәш кенә булыуына ҡарамаҫтан, наградалар алып өлгөргән. “Шайморатов”, “Хәрби ҡаһарманлыҡ өсөн” миҙалдары уның батырлығы тураһында һөйләй. Ялда сағында яҡындары эргәһендәге һәр бер көндөң ҡәҙерен белергә, ярҙамлашырға, туғандары менән күрешергә тырыша. Һәр ерҙә лә ул - ҡәҙерле ҡунаҡ. Шулай ҙа махсус хәрби операциялағы егеттәр менән дә бәйләнеш өҙөлмәй. Улар ҙа шылтыратып хәлдәрен белешеп торалар. – Бергә хеҙмәт иткән егеттәр менән бер ғаилә булып, берҙәм, татыу йәшәйбеҙ. Һәр ваҡыт бер-беребеҙгә терәкбеҙ. Махсус хәрби операция холҡомдо ла тағы ла нығытты. Хәрби тормош яуаплылыҡ, тәртип яғын да ныҡлы тәрбиәләй, – ти Учалы яугире. Утты кискән яугирҙең йәш егеттәргә армияға барыуҙың әһәмиәте тураһындағы фекере лә тик файҙаға булыр. – Армия кәрәк. Сөнки ул йәш егеттән ысын ир яһай, үҙ-үҙеңә ышанысты нығыта. Һалдат хеҙмәтен үткәндәр үҙгәреп ҡайталар, – тигән һүҙҙәрен еткерҙе йәш быуынға. Беҙҙең гәзитебеҙҙе уҡыусыларға, Башҡортостан халҡына әйткән һүҙҙәре лә фәһемле: –Тыныс тормоштоң ҡәҙерен белегеҙ. Мөмкин тиклем махсус хәрби операциялағы егеттәргә ярҙам итегеҙ. Ошо рәүешле еңеүҙе бергәләп яҡынайтырбыҙ, – тине ул. Махсус хәрби операция тамамланғас та, Учалы яугире үҙенең артабанғы юлын хәрби хеҙмәттә күрә. Уның барлыҡ хыялдарының тормошҡа ашыуын теләйбеҙ. Фото: яугирҙең архивынан. Учалы районы.