Алабайталдан ҡайтҡы килмәй

Башҡортостан етәкселеге балаларҙың йәйге ялын яҡшы итеп ойоштороуға һәр ваҡыт етди иғтибар бүлә. Мәҫәлән, быйыл да малай һәм ҡыҙҙар яңы уҡыу йылын күтәренке кәйефтә башлаһын өсөн бихисап уй-маҡсаттар тормошҡа ашырыла. Республика Башлығы Радий Хәбиров билдәләүенсә, һәр бала каникулын файҙалы уҙғарһын өсөн беҙҙә һәр яҡлап та шарттар ҙа тыуҙырылған. Йәйге һауыҡтырыу компанияһы осоронда хәүефһеҙлек мәсьәләһенә айырым иғтибар итеү зарур, һәр кем өйөнә һау-сәләмәт ҡайтырға тейеш. Ысынлап та, Башҡортостанда лагерҙарҙың беренсе сменаһы тамамланды, әле сираттағыһы үҙ эшен башланы. Әлбиттә, унда махсус хәрби операция биләмәһендәге һалдаттарҙың балалары ял итә, Луганск һәм Донецк халыҡ республикаларынан да беҙгә килделәр. Мәғрифәтсе Мәрйәм Бураҡаеваның башланғысы менән ойошторолған Башҡортостандың тарихын һәм мәҙәниәтен өйрәнеү буйынса профиль лагерҙары эшләй. Беҙгә иһә Сөләймән ауылында (халыҡ телендә – Алабайтал) урынлашҡан лагерҙың эше менән танышыу бәхете тәтене. – Башҡортостандың тарихын һәм мәҙәниәтен тәрән өйрәнеүгә йөҙ тотҡан лагерҙың тап беҙҙә ойошторолоуы барыбыҙ өсөн дә шатлыҡлы ла, ғорурлыҡ та, – тип һөйләй Ейәнсура районы хакимиәте башлығы Дәмин Юланов. – Алдынғы ҡарашлы вожатыйҙар йыйылған, улар конкурс нигеҙендә һайлап алына. "Йәйләү"гә уҡыу алдынғылары, төрлө конкурс еңеүселәре йыйылған. Ата-әсәләр ҙә ғәзиздәре нәҡ Оло Һүрәм йылғаһы буйында һаулығын нығытыуын теләй. "Аҡ елкән" лагеры шул хәтлем уңайлы урында урынлашҡан. Өфөнән, Иҫәнғол яҡтарынан килгәндәр ҙә, Йылайыр тарафтарынан юлланғандар ҙа уны еңел таба. Ейәнсура районының Күгәрсен ауылына яҡынлаһағыҙ, уға килеп еттем тип уйлаһағыҙ ҙа мөмкин, сөнки бынан ул ҡул һуҙымындай ерҙә ята. "Аҡ елкән" лагеры директоры Байрас Ҡансурин билдәләүенсә, күпме ваҡыт эшләйҙәр, ошоға хәтлем бер баланың да смена тамамланыр-тамамланмаҫтан ҡайтып киткәне теркәлмәгән. Элекке йылдарҙағы шикелле, хәҙер ҙә бик бай программа төҙөлгән. Ҡыҙ һәм малайҙар ошо өс аҙна эсендә тулыһынса асыла – бейеүгә маһирҙар, ошо өлкәләге конкурста ҡатнаша, йыр яратыусылар өсөн дә ярыш ҡаралған, спорт йүнәлешндә лә төрлө бәйгеләр булып тора. Иң мөһиме, барыһы ла башҡортса аралаша. Телгә алыуыбыҙса, йәш быуынды һәр йәһәттән дә үҫтереүгә ҡоролған төрлө саралар даими ойошторола, балаларҙың буш ваҡыты юҡ тиерлек. Бөйөк Еңеүҙең 80 йыллығына арналған осрашыу шуға асыҡ миҫал. Ул ҡыҙ һәм малайҙар күңелендә оҙаҡ һаҡланырында тамсы ла шик юҡ. Бай тәжрибәле китапханасы Гөлнур Әлмөхәмәтова һуғыш тураһында, яҡташтарыбыҙҙың батырлыҡтары, дошманды еңеп дан менән тыуған яҡтарына ҡайтыуҙары хаҡында тәфсирләп һөйләне. Ә инде балалар араһында ошо юҫыҡта үткәрелгән викторинала ҡатнашыу өсөн хатта сират хасил булды. Белеүебеҙсә, Ейәнсура төбәге әлә күпме хәрбиҙәрҙе үҫтереп сығарған. Прапорщик Рим Ҡыҙрасовтың шәхси күргәҙмәһе менән танышты балалар, уға үҙҙәрен ҡыҙыҡһындырған төрлө һорауҙарҙы ла бирҙе. Ейәнсура, ысынлап та, донъяға бик күп күп арҙаҡлы шәхестәрҙе биргән. Ерәнсә сәсән, Булат Ишемғолов, Марат Кәримов, Хәсән Назар, Мәрйәм Бураҡаева һәм башҡалар шуға асыҡ миҫал. Был уңайҙан квест уҙҙы, үҫмерҙәр арҙаҡлыларҙың ижады һәм тормош юлы менән таныштырҙы. Бында балалар төрлө ырыуға бүленгән. Үҫәргән, Ҡыпсаҡ, Бөрйән, Юрматы, Тамъян, Мең, Түңгәүер һәм башҡалар шуға асыҡ дәлил. Улар күмәкләшеп ырыу стена гәзитен сығарҙы. Ейәнсура районында ялдарын уҙғарған балалар бында килеүҙәренә һис тә үкенмәйәсәк. Алабайтал Советтар Союзы Геройы Ҡотләхмәт Хәйбуллиндың тыуған ере булараҡ дан тота, ошо ауыл янында билдәле яҙыусы Сергей Чекмаревтың һәйкәле бар. Фото: Илдар Аҡъюлов.