Бүздәк районының Әмир ауылы халҡы, бөтә эштәрен ташлап, Баҡса урамына байрамға йыйылды. Был эште ойоштороуҙы Әлиә Тимерйәнова менән Зәлифә Ергизова ҡулдарына алған. Байрамға ошо урамда йәшәгән ауыл советы рәйесе Валерий Исхаҡовты ла ҡунаҡҡа саҡырҙылар. – Тыуған яҡҡа һөйөү йәшәгән йортоңдан, ихатаңдан, урамдан башлана. Уның тарихы таҙа аҡ ҡағыҙҙан башланмай, ул урамда йәшәгән кешеләр яҙмыштарынан туҡыла. Беҙ бергә йыйылып уңыштарыбыҙға йышыраҡ шатланһаҡ ине, борсоған мәсьәләләребеҙҙе уртаға һалып хәл итһәк ине. Баҡса урамы артабан да башҡаларға өлгө булһын, – тине Валерий Владикович. Урам байрамса төҫ алған. Ҙур өҫтәлдә самауыр боҫрай, мул табын әҙерләнгән. Ауылдың аҡһаҡалы Вил Хәкимов урамдың ни өсөн Баҡса тип аталыуын аңлатып үтте. Киәҙе йылғаһының ике яҡ яры буйлап үҫкән баҡсаларҙа элек ҡарбуз, ҡауын, помидор, һуған, кәбеҫтә емерелеп уңған булған. Ошо урамда тыуып үҫкән Риф Дәүләтшин, Минзифа Исхаҡова, Динара Хәбибова, Вил Хәкимов – ауылдың иң оло кешеләре. Ғүмер буйы ошо ерҙә хеҙм