Федераль министр урынбаҫары вуз-ара кампус төҙөлөүенә иң юғары баһа бирҙе

Рәсәйҙең Фән һәм юғары белем министры урынбаҫары Денис Секиринский Өфөләге вуз-ара студенттар кампусын «заманса, прецедентһыҙ төҙөлөш һәм фәнни инфраструктураны агрессив үҫтереү» тип атаны. Ул был хаҡта Башҡортостандың баш ҡалаһында асылған XIII Бөтә Рәсәй йәш ғалимдар һәм студенттар фәнни берләшмәләре советтары съезының пленар ултырышында белдерҙе. – 50-се-60-сы йылдарҙа Новосибирскиҙа төҙөлгән Академия ҡаласығын ғына күләме яғынан оҡшаш төҙөлөш тип атай алам, – тине ул. Министр урынбаҫары республикабыҙҙың фәнни-технологик үҫеш яғынан ил төбәктәре араһында алдынғы урындарҙы биләүен, ә тикшеренеүҙәр үткәреү өсөн мөхит булдырыу буйынса субрейтингта 1-се урында торғанын белдерҙе. “Был тикшеренеүселәргә бында ни тиклем уңайлы икәнен күрһәтә”, – тине Денис Секиринский. Федераль спикер фәнгә үҫешеү өсөн тотороҡлолоҡ һәм эҙмә-эҙлелек мөһим, тип билдәләне. Был шул ҡәҙәре ҙур тармаҡ: 700 меңләп кеше, дүрт меңдән артыҡ ойошма тикшеренеүҙәр, уйлап сығарыуҙар өлкәһендә эшләй. Пленар ултырыштан съездың рәсми өлөшө башланды. Ҡатнашыусылар технология компанияларының, фәнни ойошмаларҙың тәжрибәһен күҙ уңында тотоп яңы технологиялар булдырыу мәсьәләләре буйынса фекер алышты. Илебеҙҙең технология өлкәһендә алдынғылыҡҡа өлгәшеүе өсөн йәш ғалимдарҙың роле тураһында ла һөйләшеү булды. Рәсәйҙең фәнни-технологик лидерҙарының береһе булған Башҡортостандың тәжрибәһенә айырым иғтибар бүленде. БР Башлығы Радий Хәбиров, тотош илдән ғәйәт күп йәш ғалимдарҙы ҡабул итеү республикабыҙ өсөн ҙур абруй һәм яуаплылыҡ, тип билдәләне. – Был республикабыҙҙың йәш ғалимдары берлегенең үҫеше өсөн ҙур этәргес”, – тине ул һәм йәш ғалимдың үҙ миссияһы булыуын, йәмғиәттең уны хөрмәт итеүен аңлауының да мөһимлеген телгә алды. Пленар ултырышта шулай уҡ Президент ҡарамағындағы Фән һәм мәғариф өлкәләрендә йәштәр эштәре буйынса Координация советы рәйесе Никита Марченков, Дәүләт Думаһының Фән һәм юғары белем буйынса комитеты рәйесе урынбаҫары Александр Мажуга, БР Вуздар ректорҙары советы рәйесе Валентин Павлов, Өфө нефть-техник университеты ректоры Олег Баулин, “Фәнни һм мәғрифәти башланғыстарҙы үҫтереү үҙәге” ойошмаһы директоры Ольга Тарасова, Санкт-Петербург Химия институты профессоры, РФ Президентының йәш ғалимдарға фән һәм инновациялар өлкәһендә премияһы лауреаты Ирина Тимофеева ҡатнашты. Иҫегеҙгә төшөрәбеҙ, 2-4 июлдә Өфөлә XIII Бөтә Рәсәй йәш ғалимдар һәм студенттар фәнни берләшмәләре советтары съезы үтә. Сығанаҡ – БР Хөкүмәтенең рәсми сайты: https://pravitelstvorb.ru/news/27062/