Истиҥ тылынан
Олус суохтуубут, ахтабыт
Биһиги дьиэ кэргэн күндү киһибит таптыыр кэргэним, аҕабыт, эһээбитин Боппосов Роберт Петрович ыарахан ыарыы сытыы тыҥыраҕынан кыһарыйан илдьэ барбыта бэс ыйын 30 күнүгэр биир сылын туолла.
Роберт Петрович 1953 с. алтынньы ый 10 күнүгэр Дьэр нэһилиэгэр бастакы оҕоннон күн сирин көрбүтэ. Өктөм орто оскуолатын бүтэрэн Советскай Армияҕа сулууспалаан иэһин төлөөн баран тыа хаһаайыстыбатын техникумугар киирэн «Зоотехник» идэтигэр үөрэнэн өр сылларга зоотехнигынан, биригэдьииринэн, кэнники техник-осеменатор идэтин баһылаан олус таһаарыылаахтык үлэлээбитин элбэх грамоталар, дипломнар туоһулууллар.
Сопхуостар эстибиттэригэр улаханнык ыалдьыар дылы кэтэх хаһаайыстыбатыгар сынньаланы билбэккэ үлэлээн хачыгырайбыта. Роберт Петрович сахалыы толкуйдаах киһи этэ, сахалыы сыыс тыла суох лоп бааччы саҥарара. Элбэҕи ааҕара, кинигэтэ, хаһыата, суох күнэ ааспата. Улахан суруйааччылар сүрүн айымньыларын ааҕа билэрэ, спорду, чуолаан – тустууну, хапсаҕайы, мас тардыһыытын ыһыахтарга, телевизорынан тугу барытын умнан туран сөбүлээн көрөрө.
Аҕабыт олус сэмэй, биллэ көстө сатаабата, оҕолорун, сиэннэрин олус таптыыра, улаата түстэхтэринэ окко, балыкка илдьэ сылдьыам диэн баҕа санаалааҕа.
Олус ыарахан сыл ааста, кэргэммин, аҕабытын, эһээбитин олус суохтуубут, ахтабыт. Тапталлаах киһибитин сүтэрбит курус күннэрбитигэр өйөбүл, тирэх буолбут аймах-билэ дьоммутугар табаарыстарыгар махталбытын тиэрдэбит, дьолу-соргуну баҕарабыт.
Күндү киһибит биһиги өйбүтүгэр-сүрэхпитигэр өр сылларга сырдыгынан сыдьаайа кэрэ өйдөбүл буолуо...
Кэргэнэ, оҕолоро.