Молитва ко Пресвятой Богородице о помощи и защите.
Ходатаица теплая за род прелюбодейный и грешный! По глаголу Твоему в Кане Галилейстей Сын Твой и Бог наш сотвори начаток знамением и притвори воду в вино. Упроси же, о Матерь Божия, и ныне Сына Твоего, да сотворит и над нами чудо, да претворит скорбные дни наши, повитыя ложью, обидой и слезами, в радость возрождения, в счастье любве и правды; да укрепит в нас начало Божественнаго Света, источник чистый Духа Бога Святаго, Триединаго. Все же лукавое и нечистое да изженет из сердца нашего. О, Чистото недосягаемая и Милосердие неизреченное! Приклони ухо Твое к молитве нашей: о, Преблагословенная Богородице Дево, радость и прибежище всем христианам: покланяяся Твоему Пречистому образу, Тебе поем хвалебную песнь, Тебе приносим свои нужды, горе и слезы. Ты же, о Кроткая Заступнице наша, Тебе близки все наши земные скорби и печали, прими же наши в молитвах воздыхания, помози нам и от бед спаси.
О, величайшая Любве и благоуханнейшее сердце! Отврати от нас гнев Божий, за грехи наша праведно на нас движимый; укрепи любящия нас, да не поколеблет их ни гонение, ни время лютое; вразуми ненавидящих нас и творящих нам напасть; прости врагов наших, неведущих что творят, смягчи гневное сердце их, и озари их мрак светом любве Христовой, а злобу и ненависть их претвори в стыд и раскаяние. О, Цвете благоуханный! Сосуды наши пусты, елея добрых дел несть у нас и светильники веры нашей от бури житейской угасают. Умилосердися же над нами: наполни сердца наша веселием чистых радостей, духовно обнови нас, да благодарными устами непрестанно взываем к Тебе: о, Всепетая Мати Марие, рождшая всех святых Святейшее Слово! Нынешнее прими наше приношение, от всякия избави напасти всех. Согрей материнскою любовию, возвесели нас вечною радостию. Спаси от вечных мук непрестанною к Сыну Твоему молитвою и небесного Царствия нас, Царице, сподоби. Аминь.