Президент Садыр Жапаров Малайзиядагы иш сапарында Жакынкы Чыгыштагы чыңалууну тынчтык жолу менен чечүүгө чакырып, палестин элинин өз алдынча мамлекет куруу укугун колдой турганын билдирди.
🇰🇬 Президент Садыр Жапаров Малайзияга расмий сапарынын алкагында Путраджая шаарында Малайзиянын премьер-министри Анвар Ибрагим менен сүйлөшүүлөрдүн жыйынтыгы боюнча маалымат каражаттарына билдирүү жасады. Кыргызстан Жакынкы Чыгыштагы чыңалуунун күчөшүнө терең тынчсыздануусун билдирип, бул аймактагы абалды туруксуздаштыруу коркунучун жаратканын белгиледи.
🕊️ Кыргызстан бардык тараптарды абалды курчутууга алып келүүчү аракеттерден алыс болууга жана талаш-тартыштарды тынчтык жолу менен чечүүгө чакырды.
🚨 Газа секторундагы трагедиялык окуялар дагы эле уланып жаткандыгын баса белгиледи. БУУнун мүчө мамлекеттери катары бул маселени чечүүнүн жолдорун биргелешип издеп, тынчтык жолу менен чечүүгө умтулуу биздин милдетибиз деп эсептейбиз.
🌍 Кыргыз Республикасы эл аралык коомчулуктун, биринчи кезекте БУУнун Коопсуздук Кеңешинин аракеттерин колдойт. Бул аракеттер согуштук аракеттерди токтотууга, Газа секторундагы гуманитардык кризисти жеңүүгө, саясий диалогду баштоого жана палестино-израиль жаңжалын БУУнун резолюцияларынын жана “эки элге эки мамлекет” принцибинин негизинде тынчтык жолу менен чечүүгө багытталышы керек.
🤝 Кыргыз Республикасы палестин элинин өзүн-өзү аныктоо, өз алдынча мамлекет түзүү жана БУУга толук кандуу мүчө катары кирүү укугун тааныйт жана колдойт.