МХО ветерандары "Берҙәм Рәсәй"ҙә белем ала

“Башҡортостан геройҙары” проекты – “Геройҙар дәүере” федераль программаһының дауамы. Уның маҡсаты – махсус хәрби операцияла ҡатнашыусылар араһынан идарасыларҙың яңы быуынын әҙерләү. Республикабыҙҙа был эштең яңы этабына старт бирелде. “Башҡортостан геройҙары” программаһында ҡатнашыусылар “Берҙәм Рәсәй” партияһының төбәк бүлексәһендә уҡый башланы. Проекттың партнеры булараҡ, “Берҙәм Рәсәй” эшмәкәрлекте белем биреү яғынан тәьмин итте – махсус хәрби операцияла ҡатнашҡандарға ярҙамға йүнәлтелгән өс модулле тематик программа төҙөнө. Уҡыу барышында МХО ветерандары партияның төрлө кимәлдәге майҙансыҡтары эшен үҙләштерә, граждандар менән диалог ҡорорға, уларҙың мәнфәғәттәрен яҡларға өйрәнә, социаль проекттарҙы ойоштороу йәһәтенән белемен арттыра, биләмәләр менән идара итеүҙең заманса алымдары менән таныша. Программа интерактив лекцияларҙан, тәжрибәле сәйәсмәндәр һәм эксперттарҙың тренингтарынан тора. Шулай уҡ башҡа ҡыҙыҡлы йүнәлештәр һайлау йәки тулы курс үтеү мөмкинлеге бар. Партияның төбәк бүлексәһе киләсәктә МХО ветерандары өсөн ғәмәли күнекмәләрҙән, оҫталыҡ дәрестәренән, стажировкаларҙан торған өҫтәмә модулдәр үткәрергә планлаштыра. Проектта ҡатнашыусылар республиканы үҫтереү маҡсатында эшләгән фекерҙәштәр берләшмәһен булдырасаҡ. Татьяна САЕНКО, Башҡортостан Башлығы Хакимиәтенең дәүләт хеҙмәте һәм кадрҙар сәйәсәте мәсьәләләре буйынса идаралығы етәксеһе: – “Башҡортостан геройҙары” программаһы – Рәсәй Президенты тарафынан тәҡдим ителгән “Геройҙар дәүере” федераль проектының дауамы. Ул махсус хәрби операция ветерандарына дәүләт һәм муниципаль власть органдарында, шулай уҡ республика предприятиеларында лайыҡлы урын биләү өсөн яңы белем, тәжрибә тупларға, төрлө яҡлап камиллашырға ярҙам итә. “Берҙәм Рәсәй” партияһы менән хеҙмәттәшлек Ватанды һаҡлаусыларға ҙур мөмкинлектәр асасаҡ. Артур ҒӘЛИЕВ, “Башҡортостан геройҙары”ның Йәмәғәт советы ағзаһы, Дәүләт Йыйылышы – Ҡоролтай депутаты: – Башланғыстың уңышлы булырына ышанам. Программа ярҙамында махсус хәрби операция ветерандары граждандар тормошона тиҙерәк ҡулайлашасаҡ. Алынған яңы белемдәренә МХО-ла тупланған тәжрибәләрен дә ҡушып, улар уңышлы эш алып барасаҡ, республикабыҙға ҙур файҙа килтерәсәк. Эрик ФАТЫЕВ, Дәүләкәндән махсус хәрби операция ветераны: – Беҙҙе, фронтты үткәндәрҙе, онотмауҙары, яңғыҙ ҡалдырмауҙары ҡыуаныслы. Дәүләтебеҙ төрлө яҡлап хәстәрләй, ярҙам итә. Шул иҫәптән “Башҡортостан геройҙары” программаһы – үҫеш өсөн аныҡ мөмкинлек. Беҙҙең менән эш алып барған эксперттарҙың тәжрибәһе ҙур. Уларҙан белем алыуҙың әһәмиәте баһалап бөткөһөҙ. Руслан НАСРЕТДИНОВ, “Берҙәм Рәсәй” партияһының төбәк башҡарма комитеты етәксеһе: – Был программала ҡатнашыусылар – махсус хәрби операция биләмәһендә Ватанға тоғролоҡ күрһәткән һәм әүҙем граждандар позицияһында булған яҡташтарыбыҙ. Партия майҙансығында “Берҙәм Рәсәй”ҙең Халыҡ программаһы проекттарын тормошҡа ашырыуға өлөш индереү теләген улар үҙҙәре белдерҙе. Кисә илебеҙҙе һаҡлаһалар, бөгөн тыныс тормошта граждандарҙың мәнфәғәттәрен яҡлауҙы дауам итәләр. Фото: bashkortostan.er.ru