Андрей Назаров - Краснокама районы һабантуйында

Башҡортостан Хөкүмәте Премьер-министры Андрей Назаров эш сәфәре менән Краснокама районына барып, ундағы һабантуйҙа ҡатнашты. Ул республика Башлығы һәм Башҡортостан Хөкүмәте исеменән район халҡына көндәлек хеҙмәте һәм төбәк үҫешенә баһалап бөткөһөҙ өлөш индергәндәре өсөн рәхмәт белдерҙе. – Республика Рәсәй субъекттары араһында Инвестиция мөхите торошоноң милли рейтингында лидерлыҡты һаҡлап ҡалды. Ошо көндәрҙә Петербург халыҡ-ара иҡтисади форумында 2024 йыл йомғаҡтары иғлан ителде: беҙ – илдә өсөнсө! Владимир Путин рейтинг еңеүселәрен, шул иҫәптән беҙҙең төбәкте билдәләне һәм ҡотланы. Республиканың ҡаҙаныштары уның халҡының көндәлек хеҙмәтенән тора. Һеҙҙең район да дөйөм уңышҡа ҙур өлөш индерә, – тине Андрей Назаров. Уҙған йыл йомғаҡтарына ҡарағанда, Краснокама районында үҙебеҙҙә етештерелгән тауарҙар күләме дүрттән бер өлөшкә тиерлек артҡан (124,3 процент). Ағымдағы йылдың ғинуар - апрель айҙарында ыңғай тренд һаҡланған, үҫеш ете проценттан ашып китә. 2024 йыл йомғаҡтары буйынса, ауыл хужалығы продукцияһы етештереү күләме өс миллиард һумдан күберәк, былтырғыға ҡарата үҫеш 52 процент тәшкил итә. Был күрһәткес буйынса муниципалитет төньяҡ урман-дала зонаһында икенсе урынды биләй. Ауыл хужалығы техникаһы паркы яңыртылған. Һуңғы өс йылда 113 миллион һумдан ашыу 43 берәмек техника һатып алынған. Быйыл сәсеү кампанияһы уңышлы үткән, эш 13 мең гектар самаһы ерҙә атҡарылған. Шул уҡ ваҡытта планлаштырылған күләм 15 процентҡа арттырылған. Бынан тыш, район балыҡ продукцияһы менән дан тота. Ҡарман балыҡ хужалығы - төбәктәге ошондай иң ҙур предприятиеларҙың береһе. Ул республикала ғына түгел, унан ситтә лә яҡшы билдәле. Уҙған йыл йомғаҡтары буйынса, бында 912 тонна тауар балығы һәм 129 тонна балыҡ ултыртыу материалы етештерелгән. Сәнәғәт производствоһы үҫешә. Уҙған йыл йомғаҡтары буйынса ғына тармаҡта үҫеш 40 проценттан ашҡан. Торлаҡ йылдам төҙөлә. Былтыр 47 процентҡа тиерлек үҫеш менән 25 мең квадрат метр самаһы файҙаланыуға тапшырылған. – Хәҙер артабанғы үҫеш йүнәлештәрен өйрәнеү мөһим. Яңы "Үҫеш нөктәләрен" асыу, эре инвесторҙар йәлеп итеү, барлыҡ ресурстарҙы мөмкин тиклем һөҙөмтәле файҙаланыу мөһим. Заманса технологиялар индерергә һәм юғары килемле етештереүҙе тәьмин итергә кәрәк. Муниципалитеттың үҫеш мөмкинлектәре ҙур, – тип билдәләне район хеҙмәтсәндәре менән осрашыу ваҡытында Премьер-министр. Һабантуй ҡунаҡтары милли ихаталарҙы, "Атайсал", "МХО", "Контрактник", "1941 - 1945 йылдарҙағы Бөйөк Ватан һуғышында Еңеүҙең 80 йыллығы" кеүек патриотик йүнәлештәге майҙансыҡтарҙы ҡараны, халыҡ спорт ярыштарын, уҡ атыу, маскировка селтәрҙәре үреү буйынса оҫталыҡ дәрестәрен ҡараны. – Быйыл Еңеүҙең 80 йыллығын билдәләйбеҙ. Бынан тыш, ул Ватанды һаҡлаусылар, махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылы булараҡ үткәрелә. Бөйөк Ватан һуғышы геройҙарының батырлыҡтары – беҙгә, балаларыбыҙға ҡаһарманлыҡтың ысын өлгөһө. Ветерандарға иғтибар күрһәтергә, Ватанды һаҡлаусыларҙың ғаиләләренә ярҙам итергә бурыслыбыҙ. Үҙенең хәрби хеҙмәте менән яңы тарихты яҙыусыларҙы хөрмәтләйбеҙ. Республика буйынса меңдәрсә кеше махсус хәрби операция биләмәһенә гуманитар ярҙам ойоштороуҙа ҡатнаша, хәрби хеҙмәткәрҙәрҙең ғаиләләренә булышлыҡ күрһәтә. Еңеүҙе яҡынайтыуға өлөш индергән һәр кемгә – шәхси эшҡыуарҙарға, предприятиеларға, ойошмаларға, ирекмәндәргә һәм Краснокаманың барлыҡ халҡына рәхмәт белдерәм, – тине Андрей Назаров. Ул район хеҙмәтсәндәренә наградалар тапшырҙы. Һабантуйҙа ҡатнашыусылар шулай уҡ Еңеү паркында Бөйөк Ватан һуғышында һәләк булған геройҙарға сәскәләр һалыуҙа ҡатнашты. Артабан Николо-Березовка ауылында Андрей Назаров "Никольский храм" тарихи-архитектура комплексында булды. Башҡортостандағы иң боронғо православие ғибәҙәтханаларының береһенә быйыл 475 йыл тула. Николо-Березовка – республикала беренсе урыҫ ауылы, ул XVI быуаттың беренсе яртыһында, Башҡортостан Рәсәй дәүләте составына ингәнгә тиклем үк, барлыҡҡа килгән. Ул төбәк Башлығы ярҙамында тарихи биләмә статусын алды. Премьер-министр райондың туристик йәһәттән мөмкинлектәрен баһаланы, яр буйын, караптар өсөн планлаштырылған урындарҙы һәм "Строгановтар ладьяһы" арт-объектын ҡараны. Фотолар: Башҡортостан Хөкүмәтенең матбуғат хеҙмәте.