Физицы од Нѣмціи, Швеіцаріи и Аустраліи сѫ одкрыли возможни слѣды іествованіа пѧтоі закладноі силы природы, ктора іе скрыта в глѫбинѣ атомных іѧдер. Ако одкрытіе бѫде подтвърджано, оно може поширити Стандардны модел физикы и поіаснити нѣкторы од наі‐таіных іавені во Всіеміру.
Днесі всѣ познани взаіемодѣіности изходѧт из четырѣх сил: електромагнетизм, гравитаціа, силна и слаба іѧдерна сила. Іеднак научницы предположѫт, же ины силы могѫт такоже іествовати, але в веліми малых обсѧгах.
В новому изъисканіу физицы имѣху цѣліу исканіе гипотетичноі пѧтоі силы, ктора би могла влиіати на взаіемодѣіності неутронов в іѧдру атома и околных електронов. Сѧ има предположеніе, же преносителіем овоі силы може быти «чѧстица Іукавы», іествованіе ктороі доднесі не іе подтвърдженым.
Одлично од минулых проб изъіавити нову силу в космичном обсѧгу, научницы днесі пробаху изучити поводженіе електронов в атомах калціа. Когда електроны достаіѫт додаткову енергіу, они преходѧт на по‐высоки енергетични стѫпени, и послѣ сѧ врачаіѫт назад в първо станіе. Точно времѧ прехода зависи од структуры іѧдра и може быти предповѣдано хвала Стандардному моделу.
Іеднак, дѣіѫчи анализу изотопов калціа с различным броіем неутронов, изъискатели одмѣтиху, же іествуіѫт нѣктори одклоны в изчисленіах. Ови аномаліи могѫт казати о іествованіи непознаноі чѧстицы‐преносителіа с масоі од 10 до 10 млн. еВ.
Хоті даны, кторы іе были достаны, трѣбѫт повторноі провѣры, они уменішаіѫт області исканіа пѧтоі силы и даіѫт научникам нови оріентиры дліа настѫпных експериментов. Ако хипотеза бѫде подтвърджена, то може дати свѣтло до такых таін както природа темноі матеріи или одсѫтності антиматеріи во Всіеміру.