Башҡортостан һәм "Таврос" идара итеү компанияһы килешеүгә ҡул ҡуйҙы

Башҡортостан һәм "Таврос" идара итеү компанияһы килешеүгә ҡул ҡуйҙы Башҡортостан хөкүмәте һәм "Рассвет" яуаплылығы сикләнгән йәмғиәте өҫтөнлөклө инвестиция проектын тормошҡа ашырғанда инвестицияларҙы яҡлау һәм дәртләндереү тураһында Килешеү төҙөнө. Документҡа Башҡортостан Хөкүмәте Премьер-министры Андрей Назаров һәм "Таврос" ойошмаһының "Люцерна" бизнес-йүнәлеше директоры Сергей Бобровский ҡул ҡуйҙы. "Рассвет" предприятиеһы Башҡортостанда 5,9 миллиард һумлыҡ һуғарыу селтәрен һәм люцерна мал аҙығын яһалма киптереү заводын төҙөү проектын тормошҡа ашырасаҡ. – "Таврос" – беҙҙең өсөн агросәнәғәт комплексына һалынған, инвестициялар күләме 20 миллиард һумдан ашыу булған, иң ҙур инвестор. Яңы проектҡа ыңғай ҡарайбыҙ, ул инвестиция сәғәте барышында хупланды: предприятие милеккә һалым буйынса ярайһы уҡ льготалар аласаҡ. Бөгөн ҡул ҡуйылған инвестицияларҙы яҡлау һәм дәртләндереү тураһында Килешеү юғары хәүефһеҙлек стандарттарын күҙ уңында тота. Килешеү механизмы инвесторҙарға инвестиция проекттарын тормошҡа ашырыу шарттарының түбәнәймәүен гарантиялай. Шул иҫәптән һуңғы биш йылда Башҡортостанда инвестдинамиканың һаҡланыуын да ошоға бәйләйбеҙ, – тип һыҙыҡ өҫтөнә алды Башҡортостан Премьер-министры. Әлеге ваҡытта "Таврос" дәүләт компанияһы Башҡортостанда дөйөм суммаһы 24,7 миллиард һумлыҡ алты проектты тормошҡа ашыра. Шул иҫәптән, Өфө районында "Таврос Агропарк" Агросәнәғәт паркы, шишмә районында "Агроауыл", тауар йомортҡаһын йылына 100 миллион данаға арттырып "Башҡорт" ҡошсолоҡ фабрикаһының яңы линияһы һәм сәғәтенә 30 тонна ҡеүәтле ҡатнаш аҙыҡ цехы төҙөлә, Башҡортостан ит компанияһы өсөн һимертеү комплексы төҙөлөү өҫтөндә. – Һуғарыу селтәрен һәм люцерна мал аҙығын яһалма киптереү заводын төҙөү проекты тураһында һүҙ йөрөткәндә, буласаҡ производствоны эшкәртеү ҡеүәте сәғәтенә 20 тонна тәшкил итәсәк, 2034 йылға тиклем бөтә проектты тормошҡа ашырырға планлаштырабыҙ. Проект эштәрен тамамланыҡ, документация әле дәүләт экспертизаһы үтә. 25 ямғыр машинаһы менән тәьмин итеүгә контракт төҙөйбөҙ, беренсе партияны яҡын арала көтәбеҙ. Генераль подрядсы һәм субподряд ойошмалары һайланды, контракттар төҙөү процесы бара, – тип уртаҡлашты Сергей Бобровский. XXVIII Петербург халыҡ-ара иҡтисади форумы 18 июндә Санкт-Петербургта старт алды, ул 21 июндә тамамлана. Эшлекле программаның төп саралары "Экспофорум" Конгресс-күргәҙмә үҙәгендә үтә. Фотолар: Башҡортостан Республикаһы Хөкүмәтенең матбуғат хеҙмәте.