Республика мөһим сараны ҡабул итергә әҙер

19 июндә XXVIII Петербург халыҡ-ара иҡтисади форумында Республика етәксеһе Радий Хәбиров ер аҫты байлыҡтарын файҙаланыу буйынса федераль агентлыҡ етәксеһе Олег Казанов менән осрашты. Яҡтар Башҡортостанда “ГеоВызов” III халыҡ-ара геология чемпионатын ойоштороу һәм үткәреү мәсьәләләрен тикшерҙе. Олег Казанов билдәләүенсә, сараны 2025 йылдың сентябрендә үткәрергә планлаштыралар. Ҡатнашыуға Рәсәйҙең 17 төбәгенән һәм донъяның 14 иленән командалар саҡырылған – бөтәһе 250 кеше. Радий Хәбиров билдәләүенсә, Башҡортостан “ГеоВызов” халыҡ-ара геология чемпионатын үткәреүҙең даими майҙансығына әүерелергә әҙер. Төбәк етәксеһе сараны асыу тантанаһын Өфөнөң вуз-ара студенттар кампусында үткәрергә тәҡдим итте. Журналистар менән әңгәмәлә Башҡортостан Башлығы осрашыуҙың төп йомғаҡтары хаҡында һөйләне. – Төп һорау – һибелмә алтын сығарыу буйынса лицензияны биреүгә һалынған мораторий ваҡытлыса булмаһын. Был мәсьәләне башҡаса хәл итергә кәрәк. Шуға күрә беҙ Роснедр етәксеһе менән июлдә уның республикаға килеүе һәм профилле кәңәшмә үткәреүе тураһында һөйләшеп килештек. Иң мөһиме, беҙҙе ишеттеләр – беҙ алтын табыуҙың элекке тәжрибәһе варвар ысулы менән алып барылыуын аңлаттыҡ, – тип йомғаҡ яһаны Радий Хәбиров. – Беҙ шулай уҡ республикала даими рәүештә геологик разведка үткәрелергә тейешлеген тикшерҙек. Был федераль тарих, федераль финанслау. Һәм беҙ, ғөмүмән, Башҡортостандың “Геосәйәсәт” олимпиадаһын даими үткәреүҙең төп майҙансығы буласағы тураһында һөйләшеп килештек. Был бик яҡшы, сөнки республика цивилизациялы геологик разведка һәм ер аҫтын эшкәртеү өлкәһендә ҙур компетенцияларға эйә. Фото: Башҡортостан Башлығы сайты.