Юғары партия мәктәбенең Башҡортостандағы филиалына - юғары баһа

26 июндә Мәскәүҙә Башҡортостан Башлығы, "Берҙәм Рәсәй"ҙең төбәк бүлексәһе етәксеһе Радий Хәбиров партияның Генераль советы ултырышында ҡатнашты. Көн тәртибенә эшмәкәрлектең арауыҡ йомғаҡтары, алдағы осорға пландар, Халыҡ партияһы программаһын тормошҡа ашырыу, МХО-ла ҡатнашыусыларға ярҙам күрһәтеү һәм башҡа мәсьәләләр индерелгән. Генераль совет ултырышын асып, “Берҙәм Рәсәй” рәйесе, илдең Именлек советы рәйесе урынбаҫары Дмитрий Медведев партия алдында торған төп бурыстарҙы билдәләне. – Беҙ граждандарҙың үтенестәренә тиҙ арала яуап биреүҙең мөмкинлектәрен киңәйтәбеҙ һәм урындағы кимәлдә партия ойошмалары менән депутат корпусы араһындағы бәйләнеште нығытабыҙ. Һайлаусыларҙан Халыҡ программаһының яңы вариантына индереләсәк тәҡдимдәр йыябыҙ. Иң ҙур иғтибар уға индерелергә тейешле мәсьәләләрҙе үҫтереүгә бирелергә тейеш, – тине Дмитрий Медведев. Партияның Генераль советы секретары Владимир Якушев "Берҙәм Рәсәй"ҙең эшмәкәрлеге һөҙөмтәләре, шул иҫәптән партия проекттарын һәм Халыҡ программаһын тормошҡа ашырыу тураһында ентекле һөйләне. 2024 йылға һиҙелерлек ҡаҙаныштар араһында ул әсәлек капиталын индексациялауҙы, 2,5 мең самаһы фельдшер-акушерлыҡ пункты асыуҙы, 285 мең йортҡа газ үткәреүҙе, 847 мәктәпте капиталь ремонтлауҙы, 8 меңгә яҡын ихата һәм йәмәғәт майҙанын төҙөкләндереүҙе билдәләне. Юғары партия мәктәбенең эшенә йомғаҡ яһап, Владимир Якушев уның Башҡортостандағы филиалының эшмәкәрлеген юғары баһаланы. – Форумдар барышында беҙҙең төбәктәрҙәге бүлексәләр менән аралаша башлағас, уларҙа Юғары партия мәктәбе филиалдарын асыуға етди мохтажлыҡ күрҙек - тине Владимир Якушев. - Хәҙер шундай филиал Башҡортостанда тулы ҡеүәтенә эшләй. Ошондай проектты тормошҡа ашырғанығыҙ өсөн рәхмәт, Радий Фәрит улы. Республикаға барып, филиалдың эшмәкәрлеген яҡындан күрергә була. Владимир Якушев Юғары партия мәктәбенең төбәк бүлексәләре практикаһы үҙенең һөҙөмтәлелеген иҫбатланы, тип билдәләне. Яҡын арала улар Рәсәйҙә ошондай бер төркөм бүлек асырға планлаштырыла. Осрашыу йомғаҡтары буйынса журналистар менән әңгәмәлә Радий Хәбиров республикала "Берҙәм Рәсәй"ҙең Халыҡ программаһының нисек тормошҡа ашырылыуы хаҡында һөйләне. – Халыҡты борсоған иң көнүҙәк мәсьәләләр буйынса мәғлүмәт туплау өсөн төрлө каналдар бар. Шуларҙан береһе – “Берҙәм Рәсәй”ҙең Халыҡ программаһы, тип билдәләне төбәк етәксеһе. – Бөгөн беҙ демография, уңайлы ҡала мөхите, мәктәптәрҙе яңыртыу, яҡтыртыу, социаль ярҙам менән бәйле бик күп төрлө мәсьәләләрҙе хәл итеүгә өлгәшеүебеҙҙе күрҙек. Бына шул кешенең тормошон уңайлы итә лә инде. Хәҙер улар яңы Халыҡ программаһын төҙөйәсәк. Был ысын мәғәнәһендә кешеләрҙең тормошон яҡшыртыу мөмкинлеген бирә. Башҡортостанда "Берҙәм Рәсәй" тиҫтәләрсә мең кешене берләштерә. Улар - ил мәнфәғәттәрен ҡайғыртҡан, нимәлер үҙгәртергә теләгән, партияны ысын көс итеп күргән кешеләр. Шуға күрә беҙ һүлпәнәймәйәсәкбеҙ, артабан да тығыҙ бәйләнештә эшләйәсәкбеҙ. Сығанаҡ: Башҡортостан Башлығы сайтынан