Ил Президенты яугирҙәргә ҙур ышаныс бағлай

Кремлдә ил Президенты Владимир Путиндың “Геройҙар ваҡыты” белем биреү программаһында ҡатнашыусылар менән осрашыуы үтте. Әйтергә кәрәк, был программа Президент ҡушыуы буйынса Рәсәйҙең Халыҡ хужалығы һәм дәүләт хеҙмәте дәүләт идаралығының юғары мәктәбе тарафынан тормошҡа ашырыла. Владимир Путин осрашыу башында Рәсәйҙең бөгөнгө төп идеяһы – үлемһеҙлеккә туҡталды. Ил башлығы фекеренсә, үлемһеҙлеккә ынтылыу – бөгөнгө көнгә генә түгел, ғөмүмән, Рәсәй тарихына ҡағыла. Дуҫтарының, полкташтарының һәләк булыуын үҙ күҙҙәре менән күргән, бөйөк маҡсатҡа өлгәшеү өсөн үҙ ғүмерең бирергә йәлләмәгән яугирҙәр араһында ил етәксенең үлемһеҙлек тураһындағы һүҙҙәре айырыуса тәрән яңғыраны. Владимир Путин фекеренсә, Рәсәйҙең үлемһеҙлеген фронтта яугирҙәр, тылда хеҙмәтсәндәр, лабораторияларҙа ғалимдар булдыра. Миллиондарса Рәсәй кешеһенең дөйөм еңеүе, беҙҙең дәүләтебеҙҙең мәңгелеген тәьмин итә: цивилизациябыҙҙың, мәҙәниәтебеҙҙең, телебеҙҙең һәм халҡыбыҙҙың. Ил Президенты Рәсәйҙә "Геройҙар ваҡыты" программаһына башланғыс бирҙе. Идаралыҡ системаһында кешеләрҙе алға этәреү өсөн патриотизм һәм әхлаҡи сифаттар шарт булып тора. Путин иң яҡшы команданы формалаштыра. Улар Рәсәйҙе яңы уңыштарға алып киләсәк. Ирҙәр һәм ҡатындар, генералдар һәм рядовойҙар, йәштәр һәм ололар, Рәсәйҙең тиҫтәнән ашыу халыҡ вәкилдәре – улар барыһы ла “Геройҙар ваҡыты”нда ҡатнашыусылар. “Геройҙар ваҡыты” программаһын улар награда итеп түгел, ә илгә хеҙмәт итеүҙе дауам итеү итеп ҡабул итә. Путиндың кадрҙар программаһында ҡатнашыусылар менән осрашыуы махсус хәрби операцияһы яугирҙәрендә геройҙарыбыҙ өсөн ғорурлыҡ тойғолары уята. Улар яу яланында илгә терәк була белде, тимәк, дәүләт хеҙмәтендә лә һынатмаясаҡтар. Президенттың “Геройҙар ваҡыты” программаһында ҡатнашыусылар менән осрашыуы рухи яҡтан бер-береһенә яҡын кешеләрҙең аралашыуына әүерелде. Ышаныс, ихласлыҡ мөхитен тыуҙырҙы. Президент яугирҙәр менән ғорурлана. Уларға үҫеш өсөн яңы мөмкинлектәр бирә. Президенттың ихласлығы яугирҙәрҙең йөрәгендә лә сағылыш таба – улар үҙҙәренең идеялары, уйҙары менән уртаҡлаша. “Геройҙар ваҡыты” программаһында ҡатнашыусылар Владимир Путин менән осрашыуҙа йөрәк ҡушыуы буйынса фронтҡа юлланыуҙары, көрәштең Рәсәйҙең киләсәге өсөн мөһимлеген белдерҙе. Һәр яугирҙең тарихы – батырлыҡ өлгөһө. Президент менән осрашыуҙа улар үҙҙәре өсөн нимәлер һораманы, ә хеҙмәттәштәрен ҡайғыртты. Владимир Путин яугирҙәргә иң мөһим бурысты – йәш быуынды тәрбиәләүҙе һәм уҡытыуҙы башҡарыуҙы ышанып тапшыра. Дәүләт башлығы билдәләүенсә, балалар күңеленә ниндәй ҡиммәттәр һалынһа, был уларҙың тормош юлына йоғонто яһаясаҡ. Илебеҙ һаҡсылары ярҙамында улар патриотизм өлгөһөндә, Ватан яҙмышы өсөн яуапылыҡ тойоп үҫәсәк. Фото: Григорий Сысоев. РИА “Новости”.