“Һаҡсыл производство буйынса тренер-2025" федераль конкурсы үтә

Башҡортостан “Һаҡсыл производство буйынса тренер-2025. Ҡуллан! Өйрәт! Камиллаш!" федераль конкурсына ғаризалар тапшырыу иҫәбе буйынса тәүге өсәү араһында билдәләнде, тип хәбәр иттеләр төбәктең Хеҙмәт етештереүсәнлеге өлкәһендәге компетенциялар үҙәгенән. Республиканың 11 вәкиле «Һөҙөмтәле һәм конкурентлы иҡтисад» милли проекты (нацпроект «Эффективная и конкурентная экономика») сиктәрендә федераль компетенциялар үҙәге (ФЦК) ойошторған ярыштың төп этабына тотондо. Ситтән тороп үткәрелгән ярыштарҙа Рәсәйҙең 51 төбәгенән 177 тренер ҡатнаша. Үҙ компетенцияларын ҡатнашыусылар өс номинацияла күрһәтәсәк: «Һаҡсыл производство буйынса тренер» («Хеҙмәт етештереүсәнлеге» федераль проектында ҡатнашыусы предприятиелар вәкилдәре өсөн), «Һаҡсыл производствоға өйрәтеү системаһы» һәм «Төбәк компетенциялар үҙәге тренеры». Жюри һаҡсыл етештереү ысулдарын үҙләштереүҙе, экспертлыҡты, ҡатнашыуҙы һәм коммуникативлыҡты, шулай уҡ тәҡдим ителгән ҡарарҙарҙың ғәмәли әһәмиәтен һәм инновациялы булыуын баһалаясаҡ. - Белгестәребеҙҙең еңеүгә ҙур мөмкинлектәре бар, улар төбәк предприятиеларында яҡшы һөҙөмтәләр күрһәтте һәм республиканы лайыҡлы күрһәтергә тейеш. Конкурс шулай уҡ файҙалы тәжрибә уртаҡлашырға һәм профессиональ үҫеш аҙымдарын планлаштырырға мөмкинлек бирәсәк, – тип белдерҙе Башҡортостан Хөкүмәте Премьер-министрының беренсе урынбаҫары – төбәктең иҡтисади үҫеш һәм инвестиция сәйәсәте министры Рөстәм Моратов. 17 июнгә тиклем дауам итәсәк ситтән тороп ҡатнашыу этабында ҡатнашыусылар бер нисә задание үтәргә тейеш. 19 июндән 3 июлгә тиклем үтәлгән заданиеларҙы федераль үҙәк комитеты эксперттары баһалаясаҡ, ә конкурстың финалсылары исемлеге 11 июлдә билдәле буласаҡ. Ярыштар финалына 15 кеше үтә, улар 12 августа Мәскәүҙә осраша. Уҡытыу - «Һөҙөмтәле һәм конкурентлы иҡтисад» милли проектының «Хеҙмәт етештереүсәнлеге» федераль проектын тормошҡа ашырыуҙың төп ҡоралы. Бөгөнгө көнгә компанияларҙың һәм төбәк командаларының 110 меңдән ашыу хеҙмәткәре һаҡсыл етештереү принциптарын үҙләштергән. Фото: pravitelstvorb.ru