🪖 З 13 траўня няма сувязі з палітвязнем з Гродна Мікітам Самарыным.
«Гродзенская праваабарона» звяртае ўвагу, што ўжо месяц нічога не чуваць пра палітвязня Мікіту Самарына. Апошні ліст, які атрымалі ад яго з СІЗА, датаваны 13 траўнем. Паводле ананімных крыніц, з таго часу Самарын знаходзіцца ў штрафным ізалятары. Яму забаронена перадаваць ежу, вопратку і любыя іншыя рэчы, а таксама падтрымліваць любыя кантакты — у тым ліку атрымліваць і адпраўляць лісты. Палітвязень утрымліваецца ў рэжыме інкамунікада. Існуюць сур'ёзныя падазрэнні, што ў ізалятары яго катуюць. Здароўе і жыццё Мікіты — пад пагрозай.
Пры гэтым інфармацыя пра ход ягонай справы, даты судовых паседжанняў і стан самога вязня захоўваецца ў сакрэце. Следчаму, які вядзе справу, забаронена паведамляць родным і блізкім якую-небудзь інфармацыю.
Мікіта Самарын быў асуджаны ў снежні 2020 года на 4 гады «хіміі» за тое, што распыліў газ падчас пікета каля Кастрычніцкага РАУСа ў Гродне. Пасля тэрмін зменшылі на 2,5 года калоніі. Ён не абскарджваў прысуд і заставаўся на волі, хаваючыся ад сілавікоў. 23 сакавіка 2025 года яго затрымалі выпадкова — у яго не было дакументаў, а дадзеных, якія ён назваў, не знайшлі ў базе. Паводле міліцыі, падчас дастаўкі ў РАУС ён зламаў руку аднаму з супрацоўнікаў і спрабаваў уцячы праз раку.
Да падзей 2020 года Самарын працаваў аўтарэстаўратарам, быў сябрам клуба рэканструктараў рэтрааўтамабіляў «Вінтаж», удзельнічаў у фотасесіях і гарадскіх фестывалях.
