Республикала ябыҡ цикллы иҡтисадҡа күсеү мәсьәләһе тикшерелде

Башҡортостан Хөкүмәте ултырышында ябыҡ цикллы иҡтисадҡа күсеү буйынса план тикшерелде, тип хәбәр иттеләр министрҙар кабинетының матбуғат хеҙмәтенән. Ағымдағы йылдың 1 ғинуарынан илдә “Экологик именлек” милли проектының (национальный проект “Экологическое благополучие”) “Ябыҡ цикллы иҡтисад” федераль проекты тормошҡа ашырыла. Рәсәйҙең Тәбиғәт һәм экология министрлыҡтары төбәк биләмәһендә 2030 йыл аҙағына тиклем тейешле төбәк проектын тормошҡа ашырыу тураһында килешеү төҙөнө. Башҡортостан Хөкүмәте Премьер-министры Андрей Назаров билдәләүенсә, республика был йүнәлештә ил субъекттары араһында тәүгеләрҙән булып эшләй башланы, 2024 йылдың ғинуарында ябыҡ цикллы иҡтисадҡа күсеү буйынса саралар планын раҫланы. Ул 2024-2030 йылдарҙа 19 төп һөҙөмтәлелек күрһәткестәрен үтәүҙе күҙ уңында тота. Төп йүнәлештәр араһында яңы эшкәртеү ҡеүәттәрен төҙөү, ресурстарҙы экономиялауҙың заманса ысулдарын ҡулланыу, ҡалдыҡтарҙы ҡабаттан файҙаланыу кимәлен күтәреү һәм икенсел сеймал ҡабул итеү пункттары һанын арттырыу күрһәтелгән. – Дөйөм алғанда, Рәсәй буйынса 2024 йылда утилизаторҙар реестрына 88 предприятие инде. Әлеге көндә республика буйынса дүрт предприятие утилизаторҙар реестрында тора. Республиканың 63 муниципаль район һәм ҡала округынан 48 хакимиәт вәкилдәре икенсел сеймал ҡабул итеү пункттары булыуын раҫланы. Ҡалған 15 район һәм ҡалаға ошо йүнәлештә үҙ эшмәкәрлеген көсәйтергә тәҡдим ителде, – тип билдәләне Башҡортостандың Тәбиғәттән файҙаланыу һәм экология министры вазифаһын башҡарыусы Данил Шәрәфетдинов. Ябыҡ Цикллы иҡтисад федераль проекты экологик именлек милли проекты составына ингән алты проекттың береһе. Ул ҡалдыҡтар менән эш итеүгә ҡағылышлы бөтә йүнәлештәрҙе үҙ эсенә ала. Уның төп маҡсаты – ҡалдыҡтарҙың бөтә төрҙәре буйынса эшкәртеүҙең тәрәнлеген һәм өлөшөн арттырыу һәм, бәлки, икенсел әйләнешкә йәлеп итеү. Фото: Тәбиғәттән файҙаланыу һәм экология министрлығының матбуғат хеҙмәте.