Бишкекте өткөн бизнес-диалогдо Кыргызстандын биринчи вице-премьер-министри Данияр Амангельдиев жана Франциянын министрлери соода жана инвестиция жаатындагы кызматташтыкты талкуулашты. Кыргызстандын бизнес-климатын жакшыртуу боюнча аракеттери жана эки тараптуу байланыштарды кеңейтүү мүмкүнчүлүктөрү каралды.
🇰🇬 Бишкекте Кыргыз Республикасынын Министрлер кабинетинин биринчи орун басары Данияр Амангельдиев жана Франциянын тышкы соода жана чет өлкөдөгү француз жарандары боюнча министри Лоран Сен-Мартен катышкан бизнес-диалог болуп өттү.
💼 Франциянын медицина, жаңылануучу энергия булактары, транспорт, инновациялар, өнөр жай жана айыл чарба тармактарында иштеген алдыңкы эл аралык компанияларынын өкүлдөрү иш-чарага катышты.
🤝 Данияр Амангельдиев Франциянын министринин Кыргызстанга болгон иш сапарынын программасын жогору баалап, бизнес-диалог эки өлкөнүн соода-экономикалык жана инвестициялык кызматташтыгынын келечегин талкуулоо үчүн натыйжалуу аянтча болоруна ишенимин билдирди.
🌍 Кыргызстандын европалык инвестицияларды жана заманбап технологияларды тартууга кызыкдар экендиги жана бул жаатта бир катар реформалар жүргүзүлүп, салык системасы жөнөкөйлөштүрүлгөнү белгиленди.
📊 Француз компаниялары менен пикир алмашуу учурунда транспорттук-логистикалык инфраструктура, энергетика, фармацевтика жана туризм тармактарында кызматташуу келечеги талкууланды.
🤝 Иш-чаранын аягында тараптар кыргыз-француз соода-экономикалык кызматташтыгын мындан ары өнүктүрүүгө жана бекемдөөгө кызыкдар экендиктерин тастыкташты.