Башҡортостан Республикаһының Ауырғазы районында "Туризм һәм ҡунаҡсыллыҡ" милли проекты маҡсаттарына ярашлы" Имән сауҡалығы” (Дубовая Роща) туристик ял үҙәге барлыҡҡа киләсәк. Был хаҡта район хакимиәте хәбәр итә. База биләмәһендә балалар өсөн спорт-патриотик лагерь эшләйәсәк, ул туризмды үҫтереүҙә һәм патриотик тәрбиә биреүҙә мөһим элементҡа әйләнәсәк. Киләсәктә базала кемпинг асыу ҙа күҙаллана. Ул экотуризмды үҫтереүгә, тәбиғәткә ҡарата яуаплы ҡарашты популярлаштырыуға булышлыҡ итәсәк. – Төбәктең социаль-иҡтисади үҫеше өсөн “Имән сауҡалығы” туристик базаһын асыу ҙур әһәмиәткә эйә. Беренсенән, яңы эш урындары булдырыу эшһеҙлек кимәлен кәметәсәк, халыҡтың йәшәү кимәлен күтәрәсәк. Икенсенән, туристарҙы йәлеп итеү бәләкәй һәм урта эшҡыуарлыҡты үҫтереүгә булышлыҡ итәсәк, был үҙ сиратында төбәктең иҡтисади базаһын нығытасаҡ. Мин был проекттың үҫеш перспективаларына оптимистик ҡараштамын һәм уның районыбыҙҙың туристик инфраструктураһын үҫтереүгә мөһим өлөш булырына ышанам», — тине Ауырғазы районы хакимиәте башлығы Арслан Шәһәретдинов. "Туризм һәм ҡунаҡсыллыҡ" (национальный проект "Туризм и гостеприимство") милли проекты инфраструктураны үҫтерергә, ҡорамалдар етештерергә, тармаҡ өсөн кадрҙар әҙерләргә һәм Рәсәйҙә лә, сит илдәрҙә лә сәйәхәт итеүгә булышлыҡ итергә ярҙам итә. Туристар сифатлы хеҙмәтләндереү һәм шәп тәьҫораттар ала, ә бизнесҡа дәүләт ярҙамы күрһәтелә. Былар барыһы ла сәйәхәттәрҙе уңайлы, хәүефһеҙ һәм ҡыҙыҡлы итә. Яңыртылған милли проекттар Рәсәй Федерацияһы Президенты Владимир Путиндың ҡарары буйынса 2025 йылдан тормошҡа ашырыла. Фото: Ауырғазы районы хакимиәте сайтынан