Бөйөк Ватан һуғышы ветераны, 2-се дәрәжә Ватан һуғышы ордены кавалеры Мөхәмәтйән Ҡаҙаҡбаев бихисап боронғо йырҙарҙың уникаль варианттарын,башҡорт музыкаль фольклорының һирәк осраған өлгөләрен еткергән халыҡ йырсыһы, йыраусы, сәсән, халыҡ-ара һәм республика конкурстары еңеүсеһе һәм лауреаты булараҡ билдәле. Арҙаҡлы шәхесте яҡташтары һәм вариҫтары онотмай, Мөхәмәтйән Абдулла улының исемен мәңгеләштереү һәм традицион башҡорт сәнғәтен үҫтереү маҡсатында 20 июндә Хәйбулла районы Һаҡмар-Наҙарғол ауылында «Сәсән һүҙе нур сәсә» сәсәндәр һәм йыраусылар бәйгеһе дүртенсе тапҡыр ойоштороласаҡ. Шуныһы ҡыуаныслы: быйыл ул тәүге тапҡыр республика кимәлендә уҙасаҡ. Бының тураһында беҙгә район мәҙәниәт йортоноң халыҡ ижады буйынса методисы, Хәйбулла районының халыҡ сәсәндәр мәктәбе етәксеһе Миңзифа Ишемғолова мәғлүмәт бирҙе. —Мәртәбәле бәйге быйыл дүртенсе тапҡыр башҡорт традицион башҡарыу мәктәбенең сағыу вәкилдәренең береһе Мөхәмәтйән Ҡаҙаҡбаевтың тыуған ауылы Һаҡмар-Наҙарғолда уҙғарыласаҡ. Тәүге ко