Җиңү көне алдыннан Галиәсгар Камал исемендәге Татар дәүләт Академия театрында «Аналар улларын көтәләр» спектакленең премьерасы булды.
Әсгать Мирзаһитов драмасы – чиксез хәтер, иман һәм мәхәббәт турындагы әсәр. Һәм хәзер дә, 80 елдан соң без азатлык һәм якты киләчәк өчен көрәшкән геройларны истә тотабыз.
Вакыйгалар Бөек Ватан сугышында Җиңүнең 30 еллыгына бер көн кала башлана һәм бәйрәм көнеңдә дәвам итә. Сугыш кырларындагы фаҗигале вакыйгалар миллионлаган солдатның, улларының гомерен өзә, ләкин аларны әниләре барыбер көтеп тора. Күп вакыт узган кебек тоела, кире кайтуга өмет тә инде юк диярлек, ләкин яратучан йөрәкләр өчен түгел.
Һәр герой артында тарих: кемдер йөрәгендә саклаган авырлыкны, тынычлык бирми торган сагышны күтәреп бара, кемдер күңелендә иман ялкынын сакларга тырыша. Хәзерге һәм үткәннәр арасындагы чик югала кебек. Ихтыярсыз спектакль персонажларын кайгыртасың. Кемдер ниндидер таныш нәрсәне күрә алган, безнең туганнарда да шундый язмышлар булган бит.
Җиңү көненә туры килгән туй көне кайгы болытлары аша үтеп кергән кояш нурына әверелә. Аны тормышның дәвам итүе билгесе буларак кабул итәргә мөмкин.
Спектакль бүгенге көнгә бик туры килә. Безнең театрыбызның олпат артистларыбызның уенына карап сокланып утырдым. Күпме әйтелмәгән сүзләр, түгелгән күз яше... Тетрәндергеч… Монда Җиңү бәйрәме дә, шул ук көнне туй да, үлем, яңа гаилә туу... Бу чын тормыш. Хәзерге көндә күпме әниләр балаларын шулай ук зарыгып көтә... Әниләрнең догасында булыйк. Алар һәрвакыт безнең белән янәшә, безнең фәрештәләребез күк, – Рәйхан Габдуллина, Камал театры актрисасы.
Сугыш турында спектакльләрне хәзер дә куярга кирәк. Балаларны тәрбияләү ата-ана тәрбиясеннән башлана. Яшь буынга мондый әсәрләрне күрсәтергә мөһимме?
Земфира Файзуллина, режиссер, актерлык осталыгы буенча педагог:
Сугыш турында спектакльләр кую һәм яшь буыннарга аларны карар өчен берничә мөһим сәбәп бар:
1. Тарихны онытмау өчен – Сугышларның куркыныч нәтиҗәләрен һәм кешеләргә китергән авырлыкларны искә төшерү. Тарихны белү киләчәктә охшаш хаталарны кабатламаска ярдәм итә.
2. Патриотизм тәрбияләү – Ватан өчен көрәшкән кешеләрнең батырлыгын күрсәтү. Бу яшьләргә ватанпәрвәрлек, гаделлек һәм җаваплылык хисләрен тәрбияли.
3. Кешелеклелек һәм гуманизм турында уйландыру – сугыш трагедиясе аша кешеләрнең язмышларын күрсәтеп, мәхәббәт, ярдәм итү, толерантлык кебек кыйммәтләрне ассызыклау.
4. Эмоциональ тәрбия – спектакльләр аша яшьләр сугыш вакытындагы хисләрне, авырлыкларны күңелләрендә сизәләр, шуның аркылы аларның эмоциональ зирәклеге үсә.
5. Актуаль проблемаларга игътибар – Бүгенге көндә дөньяның төрле почмакларында сугышлар бара. Спектакльләр аша яшьләр бу проблеманың җәмгыятькә кагылганлыгын аңлыйлар.
Сугыш темасына багышланган спектакльләр – тарихи хәтерне саклау, кешелек сыйфатларын формалаштыру һәм тынычлыкка өйрәтү өчен көчле корал.
Безнең курс өчен беренче актерлар буларак чыгарган спектакль һәм без моның белән бик горурланабыз. Чөнки без легендар актерлар белән бер сәхнәдә уйнадык һәм уйныйбыз (Аллага шөкер). Моның өчен, әлбәттә, остазыбызга – Фарит абыйга зур рәхмәт. Спектакльне чыгарганда, һәрбер сәхнә репетициясен ясаганда күздән яшьләр чыга иде. Бик кызык һәм шул ук вакытта авыр спектакль булып чыкты. Тамашачыларны шушы спектакльдә бик көтеп калабыз! – Илюсә Камалиева
Премьера театрның яңа бинасының Зур залында булды. Сез дә спектакльне күрми калмагыз!
Габдуллина Индира