Ҡымыҙ терапияһы өсөн база төҙөлөрмө?

23 майҙа Башҡортостан Хөкүмәте ағзалары эш сәфәре менән Баймаҡ районында булды. Премьер-министр Андрей Назаров “Экопродукт” һөт компанияһы эшмәкәрлеген ҡараны. Унда башҡорт милли эсемлеге ҡымыҙ етештерелә. “Экопродукт” йәмғиәте директоры Рим Хафизов экологик яҡтан хәүефһеҙ аҙыҡ-түлек – башҡорт ҡымыҙы, һыйыр һөтө, һаҡланыу ваҡыты аҙ булған башҡа ризыҡтар етештереү буйынса цехты күрһәтте. Ауыл хужалығы предприятиеһы бейә һәм һыйыр һөтөнән консерванттарһыҙ, төрлө ҡушылмаларһыҙ, халыҡ-ара GMP, ISO 22000, “Хәләл” стандарттары нигеҙендә тәбиғи продукция етештерә. Андрей Назаров эш барышын, шарттарҙы баһаланы, хеҙмәткәр менән аралашты. “Предприятие башҡорт халҡындағы борондан килгән ҡымыҙ яһау йолаһын бөгөнгө алдынғы алымдар менән бәйләп, мөһим эш алып бара. Етәкселектең дә, хеҙмәткәрҙәрҙең дә барыһын ихлас, бөтә күңелен һалып атҡарыуы, был милли кәсептең тарихын белеүе күренеп тора. Киләсәгебеҙ – экологик яҡтан таҙа, сифатлы аҙыҡ-түлектә. Был предприятиеның мөмкинлектәре киң тип иҫәпләйем. Үҫеш юлдарын өйрәнеп, бөтә яҡлап ярҙам итәсәкбеҙ”, – тине Премьер-министр. 2018 йылда ауыл хужалығы аҙыҡ-түлеген лиофилизациялау цехы төҙөү буйынса беренсе этап тамамланған. Был эшкә һалынған инвестициялар күләме 52,45 миллион тәшкил иткән, яңы 20 хеҙмәт урыны булдырылған. Бөгөн предприятие тарафынан 2-се етештереү цехы сафҡа индерелгән, ул йылына 26-30 тонна ҡоро продукт әҙерләү ҡеүәтенә эйә. Һыйыр һөтө етештереү линияһы алынған һәм монтажланған, һыуытҡыстар ҡуйылған. Медицина реабилитацияһында пациенттарҙы ҡымыҙ менән дауалау йәһәтенән тәҡдимдәр (технологиялар) эшләү буйынса тикшеренеүҙәр тамамланған, һөҙөмтәһе килгән. Предприятиеның инвестиция проекты өҫтөнлөклөләр исемлегенә индерелгән. Инвестицияларҙың планлаштырылған күләме – 222,9 миллион һум, әлегә 180,3 миллион һумы һалынған, 37 яңы эш урыны асылған. 2024-2025 йылдарҙа компанияла айырым йүнәлеш булдырылған – һөт һәм функциональ аҙыҡ-түлек сәнәғәте өсөн әсетке эшләү буйынса тәжрибә производствоһы. Проект Мәскәү дәүләт университетының микробиология кафедраһы менән берлектә тормошҡа ашырыла. Эш уңышлы килеп сыҡһа, әсеткене ҡымыҙ етештереүҙә, балалар һәм спорт туҡланыуында файҙаланыу, экспортлау планлаштырыла. “Экопродукт” йәмғиәте малсылыҡты үҫтерергә, шәхси фермалар төҙөргә, аҙыҡ базаһы өсөн ер бүлеү менән шөғөлләнергә ниәтләй. Шулай уҡ район биләмәһендә ҡымыҙ терапияһы өсөн база булдырыу маҡсаттары бар. Фотолар: республика Хөкүмәте сайты.