Ош шаарынын көчөлөрүндө жүргүзүлүп жаткан оңдоо иштеринин жүрүшү менен таанышкан Адылбек Касымалиев шаар инфраструктурасын өнүктүрүү жана жол тыгындарын азайтуу максатында жаңы долбоорлорду карап чыкты.
🌆 Ош шаарында шаардык көчөлөрдү оңдоо иштери активдүү жүрүп жатат.
🔧 Р. Моминов көчөсүнүн 1,6 км узундуктагы бөлүгүн реконструкциялоо үчүн республикалык бюджеттен 195,1 миллион сом бөлүндү. Иштер 2025-жылы аяктайт деп пландалууда.
🚧 Волгоград көчөсүнүн 2,1 км узундуктагы бөлүгүн реконструкциялоо иштери да ушул жылдын аягына чейин аяктайт. Бул долбоордун сметалык баасы 142,2 миллион сомду түзөт.
🏗️ Ы. Монуев жана А. Шакиров көчөлөрүнүн кесилишиндеги эки деңгээлдүү жол чатыгынын курулушу жүрүп жатат. Бул долбоордун жалпы баасы 269 миллион сомдон ашуун. Аны каржылоо жергиликтүү бюджеттен жүргүзүлүүдө жана быйылкы жылы аяктайт деп пландалууда.
🛣️ 2025-жылы Ош шаарында республикалык бюджеттин эсебинен 11 көчө жана жергиликтүү бюджеттин эсебинен 22 көчө капиталдык оңдоодон өткөрүлөт.
👥 Адылбек Касымалиев шаарды өнүктүрүү, анын ичинде жолдорду кеңейтүү жана мыйзамсыз курулуштарды алуу боюнча иштер менен таанышып, жыйын өткөрдү. Жыйындын жүрүшүндө шаарды өнүктүрүү боюнча актуалдуу маселелер жана “Сулайман-Тоо” улуттук тарыхый-археологиялык музей комплексинин айланасын көрктөндүрүү маселелери талкууланды.
📈 Адылбек Касымалиев сапаттуу жана натыйжалуу ишке ашыруу пландарынын маанилүүлүгүн белгилеп, мамлекеттик жана муниципалдык органдардын жетекчилерине тиешелүү тапшырмаларды берди.