Ҡариҙел үҙәк район дауаханаһына, “Оҙайлы һәм әүҙем тормош” милли проектына ярашлы, заманса электрокоагулятор алынды. Хирургтар яңы ҡорамал ярҙамында киҫемдәр яһап, ваҡ тамырҙарҙан ҡан килеүен туҡтатыу өсөн бер юлы көйҙөрөп дауалау ысулын ҡуллана ала. Ҡорамал әмәлиәттәрҙе төрлө режимда һәм төрлө ағзаларҙа үткәрергә , операция ваҡытында барлыҡҡа килгән ҡан ағыуҙарын туҡтатыу мөмкинлегенә эйә. Яңы ҡорамал хирургик әмәлиәттәрҙең сифатын яҡшырта, өҙлөгөүҙәр хәүефен кәметә һәм ауырыуҙың һауығыуын тиҙләтә. Медицина персоналы яңы ҡорамал менән эшләү буйынса уҡыу курсын үткән. Оҙайлы һәм әүҙем тормош” проекты (нацпроект “Продолжительная и активная жизнь”) “Һаулыҡ һаҡлау” милли проектын һәм элекке ҙур ҡоласлы “Демография” проектының ҡайһы бер йүнәлештәрен артабан үҫтерәсәк. Тәү сиратта ярҙам сараларын ғүмер оҙайлығы илдәге уртаса күрһәткестән артта ҡалған төбәктәр һәм ауылдар аласаҡ. Милли проект һаулыҡ һаҡлауҙың тәүге звеноһын артабан яңыртыуға йүнәлтелгән, йөрәк-ҡан тамырҙары, онкология һәм диабет сирҙәре менән көрәш буйынса федераль программалар ҙа дауам итәсәк. Тап ошо мөһим милли проект 2030 йылға көтөлгән ғүмер оҙайлығын 78 йәшкә (артабан 80 йәшкә) тиклем еткереүҙе күҙ уңында тота. Рәсәй Президенты Владимир Путин ҡарары буйынса яңы милли проект 2025 йылдың 1 ғинуарынан тормошҡа ашырыла. Фото:Һаулыҡ һаҡлау министрлығының матбуғат хеҙмәте.