Звѣздознавцы од высшоучилищ Хелсинки, Дарема и Тулузы сѫ преглѧдали знаніе о бѫдѫчности Млечнаго Пѫти. Дѣло іе выдано в часопису Nature Astronomy.
Доднесі мыслиху, же наша Галактика бѫде неизбѣжно сѧ натълкти на нашу сосѣдку, галактику Андромеда чрез близ 5 миліардов лѣт. Іеднак хвала новым даным космичных далноглѧдов Хабл и Гаіа, изискатели имаху успѣх промоделирати выше точно.
100 тысѧчи симулираниі, же уважаху масу Велікаго Магеланова Облака и неопредѣленості видимых объіектов, даху информаціу, же вѣроіѧтності натълкненіа іест само 2 процента.
Вечина симулираниі каже, же галактикѣ сѧ близѧт, але сѧ натълкаіѫт само чрез 8-9 миліардов лѣт – іуж послѣ того, гды Сълнце залиши своіи ресурсы и окончи іествованіе. Нѣктора чѧсті симулираниі такоже даіе информаціу, же слиіаніа не бѫде и обѣдвѣ галактикѣ бѫдѫт іествовати независно.
Научницы акцентуіѫт, же то не іе противно реченіе предних изчислениі, але выданіе по‐доброі анализы хвала новым даным. Особну важності има доданіе влиіаніа Велікаго Магеланова Облака, кторо одклони движеніе Млечнаго Пѫти и меніши вѣроіѧтності дотыканіа до Андромеды.