Бугюн, июн айны 2-синде, Буйнакск районну Тёбен Къазаныш юртунда гьалиги заманны талапларына гёре ишленген 90 ери булангъы санав янындан уьчюнчю яшлар баву ачылды.
«Энемжая» деген бу яшлар баву, къазанышлыланы социал оьсюв тармакъда яшавун яхшылашдыра туруп, федерал, республика программалагъа гёре яшавгъа чыгъарылагъан бирдагъы бир гёрмекли иш.
Яшлар бавуну ачылывунда: ортакъчылыкъ этди ва чыгъып сёйледи Дагъыстан Республиканы Гьукуматыны Председателини заместители Абдурагьман Магьмудов, Дагъыстан Республиканы загьмат ва социал оьсюв министри Магьамматзагьит Кихасуров, Дагъыстан Республиканы Халкъ Жыйыныны Председателини заместители Руслан Ибрагьимов, Дагъыстан Республиканы билим берив министрини 1-нчи заместители Айида Далгьатова, Буйнакск районну администрациясыны аппаратыны начальниги Элдар Гьасанханов.
Идараны абзары, гиччи яшлар ойнайгъан, юхлама ятагъан уьйлери, ашайгъан уью бек арив мукъуятлы къайдада онгарылгъан. Гьар тюрлю мероприятиелер оьтгермек учун уллу актовый залы да бар.
