Барыһын да хайран ҡалдырҙы

“Башҡортостан” дәүләт концерт залында билдәле башҡорт композиторы Ләйлә Исмәғилеваның камера музыкаһы концерты үтте. Программала төрлө йылдарҙа яҙылған ҡыллы квартет, флейта, гобой, ике скрипка, альта, виолончель, фортепиано һәм литавры өсөн октет, фортепиано өсөн соната һәм ике концерт пьесаһы яңғыраны. Әҫәрҙәрҙе автор үҙе һәм Башҡортостан дәүләт симфоник оркестры солистары башҡарҙы. Концертты оркестрҙың баш дирижеры, Башҡортостандың халыҡ артисы Дмитрий Крюков алып барҙы. Исмәғилевтәр фамилияһы күптән инде Башҡортостандың музыка сәнғәте символына әйләнгән. Композиторҙар Заһир Исмәғилев һәм уның ҡыҙы Ләйлә Исмәғилева үҙҙәренең ижады, ижади мәҙәни-ижтимағи һәм педагогик эшмәкәрлеге менән башҡорт музыкаһы үҫешенә ҙур өлөш индерҙе. Ләйлә Исмәғилева – Башҡортостан Республикаһы Композиторҙар союзы рәйесе, Рәсәйҙең һәм Башҡортостандың атҡаҙанған сәнғәт эшмәкәре, Башҡортостандың халыҡ артисы, Рәсәй Композиторҙар союзының Дмитрий Шостакович исемендәге премияһы лауреаты, Салауат Юлаев исемендәге дәүләт премияһы лауреаты, З. Исмәғилев исемендәге Өфө дәүләт сәнғәт институты профессоры. Башҡортостандың мәҙәниәт министры Әминә Шафиҡова билдәләүенсә, Ләйлә Исмәғилева – сәнғәт өлкәһендә совет кадрҙар әҙерләү мәктәбен үткән юғары профессиональ композитор, бөйөк атаһының талантын үҙләштергән һәм үҙенең уникаль телен, уны тамашасыларға тапшырыу юлын тапҡан шәхес. – Ләйлә Заһир ҡыҙы композитор булараҡ төрлө жанрҙарҙа һәм формаларҙа эшләне һәм бөгөн дә уның мираҫы республикабыҙҙа ҙур һорау менән файҙалана. Уның башҡорт ере батырҙарына арналған симфонияһы һоҡландыра. Был бик тәрән, фәлсәфәүи әҫәр. Ләйлә Заһир ҡыҙы бөгөнгө йәмғиәттә барған процестарҙы сағылдыра. Мәҙәни элитаның заман менән бергә атлауы бик мөһим. Ләйлә Заһир ҡыҙы – бер нисә быуын композиторҙар тәрбиәләгән иҫ киткес педагог. Өфө сәнғәт институтының композиция кафедраһы мөдире булараҡ, үҙенең ҡанаты аҫтынан сыҡҡандарҙы оҙатып бара һәм йәш композиторҙарҙың юлын күҙәтә. Ул һәр кемде алға әйҙәй һәм улар тураһында хәстәрлек күрә. Композиторҙар союзы рәйесе булараҡ, Ләйлә Заһир ҡыҙы союздың бөтә ағзаларының да әҫәрҙәре яңғыраһын өсөн тырыша, – тип билдәләне министр. Дәүләт оркестрының генераль директоры, Башҡортостандың халыҡ артисы Артур Нәзиуллин билдәләүенсә, Ләйлә Исмәғилева – коллективтың яҡын дуҫы. – Авторҙың үҙе сәхнәгә сығыуы – бик һирәк күренеш. Был республика өсөн генә ҙур ваҡиға түгел, ә коллектив тормошонда ла мөһим мәл: беҙ композиторҙар союзы менән тығыҙ эш алып барабыҙ, яңы исемдәр асабыҙ һәм киткән авторҙарҙың исемдәрен онотмайбыҙ. Бөгөн Дәүләт оркестры музыканттарының октет һәм квартет башҡарыуы республика тарихында ҡаласаҡ, – тине Артур Искәндәр улы. Ләйлә Заһир ҡыҙы Исмәғилева концертта ҡатнашыусыларҙың барыһына ла рәхмәт белдерҙе: – Йыл ярым элек мин үҙемдең симфоник музыкам менән концерт ҡуйғайным, ә хәҙер бик аҙҙар ишеткән камера әҫәрҙәремде сәхнәгә сығарырға теләнем, – тине Лейлә Исмәғилева. – 15 йыл буйы роялдә уйнағаным булманы, шуға күрә бик тулҡынландым. Башҡарыусыларға ҙур рәхмәт: улар ғәйәт ҙур эш башҡарҙы, сөнки ҡыллы квинтет һәм октет – бик ҡатмарлы әҫәрҙәр. Залда таныштарымды, яратҡан коллегаларымды күрҙем. Барыһына ла ҙур рәхмәт! Концертта күп йылдар Ләйлә Заһир ҡыҙы етәкселек иткән Башҡортостандың Композиторҙар союзы ағзалары ҡатнашты. – Ләйлә Исмәғилева – иң көслө башҡорт композиторҙарының береһе. Уның музыкаһы – тәрән фәлсәфәүи, интеллектуаль, сағыу, ҡыҙыҡлы! – тип тәьҫораттары менән уртаҡлашты композитор Шәүрә Ғәппәсова. – Ул тамашасыға башҡорт мотивтарының матурлығын һәм оҫта композиторлыҡ техникаһында үҙенсәлеген сағылдырып тәҡдим итә. Минең яратҡан композиторҙар исемлегендә Ләйлә Исмәғилеваның исеме Шостакович, Стравинский һәм Шнитке менән бер рәттә тора. Был кистә композиторҙың фортепианола уйнауының юғары техникаһы бөтәһен дә хайран ҡалдырҙы. Ләйлә АРАЛБАЕВА. Фотолар: Марат Сарманаев.