Бөгөн Республика Йортонда Рәсәйҙең энергетика министры Сергей Цивилев менән Башҡортостан Башлығы Радий Хәбировтың осрашыуы булды һәм унда энергетика инфраструктураһы мәсьәләләре тикшерелде. “Башҡортостан – илебеҙҙең нефть һәм газ сәнәғәте, машиналар эшләү тармағы ныҡ үҫешкән, заманса эшкәртеү ҡеүәттәре һәм, әлбиттә, энергетика системаһы булған таяныу төбәге ул, – тине Радий Хәбиров. – Беҙ яңы предприятиелар асыуҙы дауам итәбеҙ. Мәҫәлән, Урал аръяғы төбәгендә тау ҡаҙылмалары сығарыу сәнәғәте үҫешә, шуға күрә бында ҡеүәте 500 кВ булған яңы ярҙамсы станция төҙөргә кәрәк”. Сергей Цивилев яңы тармаҡ объекттарын булдырыу өсөн республикаға Рәсәйҙең электр энергетикаһын үҫтереү схемаһына һәм программаһына ғариза бирергә тәҡдим итте. Фото: Башҡортостан Башлығы сайты.