«Ҡыҙыл шишмә» компанияһы Башҡортостан Республикаһында «Һөҙөмтәле һәм конкурентлы иҡтисад» милли проектында (национальный проект «Эффективная и конкурентная экономика») яңы ҡатнашыусы булды, тип хәбәр иттеләр төбәктең хеҙмәт етештереүсәнлеге өлкәһендәге компетенциялар үҙәгенән. Предприятие кальций, магний һәм калий менән байытылған гидрокарбонат-кальций һыуы етештереүгә махсуслаша. Технологик процеста – һыу әҙерләү, уны шешәләргә ҡойоу һәм етештереүҙә кеше факторы бөтөнләй ҡулланылмай, был продукцияның стериллеген һәм тәбиғи составын һаҡлауҙы гарантиялай. – «Ҡыҙыл шишмә» компанияһы – республикала шешәле һыу етештереүселәр араһынан федераль проектта беренсе ҡатнашыусы. Белгестәр ярҙамында компания төп процестарҙы оптималләштереү, сығымдарҙы кәметеү һәм етештереүҙең экологик өлөшөн көсәйтеү мөмкинлегенә эйә була. Был төбәктең предприятиеларға ярҙам итеү буйынса стратегияһына тап килә, – тип билдәләне Башҡортостан Хөкүмәте Премьер-министрының беренсе урынбаҫары – иҡтисади үҫеш министры Рөстәм Моратов. Һаҡсыл етештереү буйынса тренерҙар һыу сығарыуҙан алып әҙер продукция логистикаһына тиклем комплекслы диагностика үткәрәсәк. Пластик һауытта 0,5 литрлыҡ һыу етештереү процесына айырыуса иғтибар бүленә. Уға йәйге осорҙа ихтыяж артҡанға күрә предприятие тап ошо төр продуктты сығарыуҙы арттырырға ниәтләй. Мәғлүмәттәрҙе анализлау өсөн “аҡыллы” системалар ҡулланыу планлаштырыла. Шулай уҡ предприятиела тауар ташыу өсөн экологик транспорт төрҙәрен файҙаланырға ниәтләйҙәр. Был аҙымдарҙың барыһы ла ябыҡ етештереү циклын булдырыуға йүнәлтелгән, унда һәр операция ресурстарҙы экономиялау һәм тәбиғәткә аҙыраҡ зыян килтереү өсөн уйлап сығарыласаҡ. «Һөҙөмтәле һәм конкурентлы иҡтисад» милли проектының маҡсаттары –иҡтисадты, финанс баҙарын, конкуренцияны үҫтереү, эшҡыуарлыҡҡа ярҙам итеү, хеҙмәт етештереүсәнлеген һәм инвестиция әүҙемлеген арттырыу, шулай уҡ тирә-яҡ мөхиткә кире йоғонтоно кәметеү. Яңыртылған милли проекттар РФ Президенты Владимир Путин ҡарары буйынса 2025 йылдан тормошҡа ашырыла. Фото: https://gtrk.tv