Сибай тау-байыҡтырыу комбинатында эштәр тергеҙелә

19 майҙа Республика йортонда Башҡортостан Башлығы Радий Хәбиров тау-металлургия тармағы предприятиелары – "Полиметалл" (алтын, көмөш һәм баҡыр сығарыу менән шөғөлләнгән тау-мәғдән компанияһы) һәм "Учалы тау-металлургия комбинаты" вәкилдәре менән осрашты. Көн тәртибендә компаниялар менән үҙ-ара эш итеү, эре индустриаль һәм социаль проекттарҙы тормошҡа ашырыу мәсьәләләре ҡаралды. Шуны билдәләргә кәрәк: 2025 йылда "Полиметалл" етештереү ҡеүәттәрен яңыртыу өсөн "Учалы тау-байыҡтырыу комбинаты"нан Сибай тау-байыҡтырыу комбинаты активтарын һатып алды. Осрашыуҙа компанияның инвестиция программаһы, шулай уҡ Сибайҙы үҫтереү мәсьәләләре тикшерелде. Төбәк етәксеһе тау эшселәренә республика менән берлектә эшләгән өсөн рәхмәт белдерҙе. – Беҙ ер аҫты байлыҡтарын файҙаланыусылар менән уңышлы хеҙмәттәшлек итәбеҙ, һөҙөмтәле мөнәсәбәттәр үҫтерәбеҙ. Уның предприятиелары төбәктә ҙур эш алып бара, күләмле инвестиция программаһын тормошҡа ашыра. Килеп тыуған мәсьәләләрҙе бергәләп хәл итәбеҙ, – тип билдәләне Радий Хәбиров. - Республикала оҙаҡ йылдар эшләгән тау эшселәренең ярҙамында сәнәғәтебеҙҙе үҫтереү менән ҡыҙыҡһынған "Полиметалл" компанияһы кеүек көслө партнер барлыҡҡа килеүе мөһим. Башҡортостан Хөкүмәте Премьер-министры Андрей Назаров билдәләүенсә, Сибайҙағы тау-байыҡтырыу фабрикаһы яңы инвестор килеү менән икенсе һулыш аласаҡ. – Республика өсөн Урал аръяғының, айырыуса файҙалы ҡаҙылмалар тармағының нисек үҫешеүе бик мөһим. Шул уҡ ваҡытта иҡтисад үҫеше балансын, шулай уҡ экологик хәлде һәм урындағы халыҡтың йәшәү сифатын һаҡлау кәрәк, – тине Андрей Назаров. - "Полиметалл" компанияһының Сибайҙа етештереү ҡеүәттәрен үҫтереү өсөн кәрәкле технологиялары һәм компетенциялары бар. Шул уҡ ваҡытта байыҡтырыу фабрикаһының эшмәкәрлеге цивилизациялы буласағын аңлайбыҙ. Бынан тыш, емереклектәр һәм карьер контролдә булһын өсөн эш алып барыласаҡ. Сибайҙа эшкәртеү ҡеүәттәрен үҫтереү пландары тураһында тулыраҡ "Полиметалл УК" компанияһының Урал филиалы директоры Андрей Новиков һөйләне. – Беҙ Сибайҙа ҡеүәттәрҙе яңыртасаҡбыҙ, шулай уҡ был өлкәлә элек эшләгән урындағы халыҡтан квалификациялы персонал йыясаҡбыҙ, – тине Андрей Новиков. Сибай хакимиәте башлығы Сергей Озерцов "Полиметалл" акционерҙар йәмғиәте менән хеҙмәттәшлек итеү мөмкинлектәрен юғары баһаланы. - Бындай инвесторҙың килеүе ҡала өсөн яңы үҫеш этабы буласаҡ. Компанияның эшмәкәрлеген киңәйтеү Сибайҙа 500-гә яҡын яңы эш урыны булдырырға мөмкинлек бирәсәк, - тине Сергей Озерцов. - Бынан тыш, берлектәге эш урта һөнәри белем биреү учреждениеларына ярҙам итеүҙе, шулай уҡ ҡала инфраструктураһын үҫтереүҙе үҙ эсенә аласаҡ. Сәнәғәтте үҫтереүҙең яҡшы перспективаларын иҫәпкә алып, Сибайға элек илдең башҡа төбәктәрендә вахта ысулы менән эшләгән белгестәр ҡайта, тип билдәләне Радий Хәбиров. Дөйөм алғанда, "Полиметалл" компанияһының пландары төбәк иҡтисады өсөн ҙур әһәмиәткә эйә. – Сибай тау-байыҡтырыу комбинаты - республикабыҙҙың ҙур предприятиеһы. Уның эшмәкәрлеге туҡтатылғайны. Хәҙер комбинаттың яңы хужаһы – мәғдән сығарыу һәм эшкәртеү буйынса юғары компетенциялы ҙур һәм көслө компания барлыҡҡа килде, – тине төбәк етәксеһе. *** Шулай уҡ ошо көндә Өфөлә "Полиметалл" акционерҙар йәмғиәте һәм Сибай хакимиәте социаль-иҡтисади хеҙмәттәшлек тураһында килешеү төҙөнө. Документ ҡала үҫешенә ҡағылышлы йүнәлештәрҙең киң спектры буйынса үҙ-ара эш итеүҙе күҙ уңында тота. Фото: glavarb.ru