Кыргызстанга Мали, Кирибати, Вануату, Тонга, Тувалу, Палау, Буркина-Фасо, Соломон аралдары жана Сан-Томе жана Принсипи өлкөлөрүнүн БУУдагы элчилери келип, министр Жээнбек Кулубаев менен жолугушту. Алар Кыргызстандын БУУдагы иш-аракеттерин жогору баалап, климаттын өзгөрүшү, тоо күн тартиби жана туруктуу өнүгүү сыяктуу глобалдык демилгелерди талкуулашты.
🇰🇬 Кыргызстан эл аралык аренада демилгелерин илгерилетүүдө активдүү иш алып барууда. Мали, Кирибати, Вануату, Тонга, Тувалу, Палау, Буркина-Фасо, Соломон аралдары жана Сан-Томе жана Принсипи өлкөлөрүнүн туруктуу өкүлдөрү Кыргызстанга иш сапар менен келишти.
🌍 Жолугушууда Кыргызстандын тышкы иштер министри Жээнбек Кулубаев өлкөнүн жетишкендиктери жана пландаштырылган ири иш-чаралар тууралуу кеңири маалымат берди.
🤝 Кулубаев Бириккен Улуттар Уюму (БУУ) Кыргызстандын тышкы саясатынын артыкчылыктуу багыты экенин белгилеп, уюмдун алкагындагы кызматташтык жана Кыргызстандын демилгелери тууралуу айтып берди.
🌿 БУУдагы чет элдик өлкөлөрдүн элчилери Кыргызстандын уюмдагы ишин жогору баалап, климаттын өзгөрүшү, тоо демилгелерин илгерилетүү, биологиялык ар түрдүүлүктү сактоо, туруктуу өнүгүү жана тынчтык менен коопсуздук маселелерине арналган демилгелерин баса белгилешти.
💬 Тараптар эл аралык күн тартиби, дүйнөдөгү геосаясий кырдаал, Борбордук Азиядагы кызматташтык жана актуалдуу глобалдык маселелер боюнча пикир алмашышты.
🏢 Чет элдик элчилер ошондой эле Кыргызстандын санариптештирүү жаатындагы жетишкендиктери менен таанышуу үчүн “Кызмат” мамлекеттик мекемесине, Технопаркка жана БУУнун өнүгүү программасынын кеңсесине барышат.