Скульптор хөрмәтенә музей асылған

Башҡортостандың атҡаҙанған мәҙәниәт хеҙмәткәре, Рамаҙан Өмөтбаев исемендәге премия лауреаты Хәйҙәр Ғарипов хөрмәтенә Сибай институтында музей асылған. Был хаҡта филология фәндәре кандидаты, Башҡортостандың атҡаҙанған мәғариф хеҙмәткәре, билдәле ғалимә Ғәҙилә Бүләкова хәбәр итә. "Һуңғы осорҙа битләүемдә йүнләп бер нәмә лә ҡуйған юҡ ине, хатта ҡайһы бер таныштар, хәл белешеп, ниңә бер нәмә лә яҙмайһығыҙ ул, әллә ауырыштырып тораһығыҙмы, тип тә төбәшкәне булды. Барыһы ла яҡшы, әлхәмдүлилләһ, Аллаһыма мең шөкөр. Эш шунда: кемдер әйтмешләй, бөтә ашаған-эскәнде, ҡайҙалыр барып, кем менәндер күрешкәнде фотоға төшөрә һалып, Интернетҡа ҡуя һалып барырға мин бит бер блогер түгел. Нигеҙҙә, күңелгә ныҡ оҡшаған, тулҡынландырған, ҡанатландырып ебәргән, ғөмүмән, үҙем өсөн генә түгел, башҡалар өсөн дә иғтибарға лайыҡ булырҙай хәл-ваҡиғалар тураһында яҙмалар ҡуйыуҙы ғәҙәт итеп алғанмын. Һәм бына кисә тап ана шундай ваҡиға булды ла инде: Өфө фән һәм технологиялар университетының Сибай институтында (филиал) күренекле скульптор, Башҡортостан Республикаһының атҡаҙанған мәҙәниәт хеҙмәткәре, Р. Өмөтбаев исемендәге премия лауреаты Хәйҙәр Халидар улы Ғариповҡа музей асыу тантанаһында ҡатнашырға насип булды. Ысынлап та, сирек быуатҡа яҡын ғүмеремде биргән был уҡыу йортон үҙе бер музейға торошло итеп оформить итеүгә (биҙәү тип кенә әйтеп булмай) баһалап бөткөһөҙ ҙур өлөш индергән Хәйҙәр Халидар улына бик үҙенсәлекле музей асып, институттың хәҙерге директоры - педагогика фәндәре кандидаты Илдар Сәлихйән улы Хәмитов етәкселегендәге ғилми-педагогик хеҙмәт коллективы ҙур эш башҡарған. Институттың төп корпусы алдындағы Арҙаҡлы шәхестәр аллеяһындағы Шәйехзада Бабич, Зәйнәб Биишева, Рәми Ғарипов, Һәҙиә Дәүләтшина, Мөхәмәтша Буранғоловтарға, шулай уҡ Сибайҙың үҙәк майҙанындағы Салауат Юлаев, Советтар Союзы Геройы А.Ф.Беловҡа, Учалы ҡалаһында һәм ауылдарында ҡуйылған байтаҡ ҡына уникаль һәйкәл һәм бюстар авторы булған Хәйҙәр Ғарипов, әлбиттә, ҙурыраҡ исемдәргә лә лайыҡ шәхес ине. Шулай ҙа һуң булһа ла, уң булһын, ти бит халыҡ. Сибай институтында быға тиклем эшләп килгән музейҙар һымаҡ, быныһы ла тағы ла киңәйеп, тулыланып, йәш быуынды күренекле шәхестәр өлгөһөндә тәрбиәләүгә үҙ өлөшөн индерәсәгенә шик юҡ. Эйе, билдәле ғалимыбыҙ әйтмешләй, милләтте уның арҙаҡлы шәхестәре күтәрә. Беҙгә ана шул арҙаҡлы шәхестәребеҙҙе күтәреүҙә иҫ киҫкес ҙур эш башҡарған Хәйҙәр ағай Ғарипов һымаҡ ябай ҙа, шул уҡ ваҡытта бөйөк тә шәхестәребеҙҙе күрә һәм уларҙың хеҙмәтен баһалай белергә генә кәрәк... Был тәңгәлдә сибайҙарға афариндан башҡа һүҙ юҡ. Ҙур рәхмәт һеҙгә, элекке коллегаларым!" - тип яҙған ғалимә Ғәҙилә Мөҙәрис ҡыҙы. Сығанаҡ һәм фото: Ғәҙилә Бүләкова.