📵 Палітзняволены журналіст з Гродна Дзяніс Івашын ужо пяць месяцаў без тэлефанаванняў родным
Журналіст і палітзняволены Дзяніс Івашын не мае сувязі з роднымі ўжо пяты месяц. Пра гэта паведаміла ягоная жонка Вольга Івашына на Facebook.
«Нядаўна мы даслалі Дзяніс Івашын фотаздымкі з нашага лецішча. Сярод іншых да яго меўся патрапіць і момант, калі на даху хаты затрымаліся двое буслоў. Гэта адбылося напрыканцы красавіка. Падаецца, гэта так бы мовіць “нашыя” буслы, якія штогод прылятаюць у ваколіцы да сваёй бусьлянкі. Я памятаю, як яны ляталі ў тым ліку і над нашым участкам у пошуках ежы для сябе й сваіх бусьлянятаў. Але бадай што ўпершыню яны абодва вырашылі “праверыць на трываласьць” наш дах.
Аматары розных “знакаў” пэўна нешта могуць сказаць на гэты конт, але я проста падзялюся з вамі мілым фотаздымкам у гэты трошкі сумны й ня надта цёплы ва ўсіх сэнсах час».
Дзяніс Івашын нарадзіўся і жыў у Гродне. З 2014 года быў рэдактарам-валанцёрам беларускай версіі сайта міжнароднай расследавальніцкай супольнасці InformNapalm, а з 2018-га — пазаштатным карэспандэнтам газеты «Новы час». Асноўныя тэмы яго расследаванняў — уплыў «русского мира» на Беларусь і Сірыю, скандальная забудова ў Курапатах, а таксама пераход былых украінскіх беркутаўцаў у сілавыя структуры Беларусі.
12 сакавіка 2021 года журналіста затрымалі супрацоўнікі КДБ, абвінаваціўшы яго ва «ўмяшанні ў дзейнасць міліцыі». У ягонай кватэры прайшоў ператрус, які цягнуўся да глыбокай ночы.
14 верасня 2022 года суд прызнаў яго вінаватым яшчэ і ў «здрадзе дзяржаве» і асудзіў на 13 гадоў і 1 месяц калоніі ўзмоцненага рэжыму.
