👩🎨 Польская мастачка з вядомай дынастыі творцаў, якая стварала свае шэдэўры ў Гродне і ваколіцах. Нядаўна яе карціну, павязаную з Гродна, выстаўлялі на вядомым польскім аўкцыёне
🤩 11 траўня 1976 года ў Любліне памерла Луцыя Балзукевіч.
Нарадзілася 13 снежня 1887 года ў Вільні. Яна была часткай знакамітай дынастыі творцаў: яе браты Баляслаў і Юзаф таксама сталі мастакамі, а бацька скульптарам.
🌗 Луцыя атрымала першую мастацкую адукацыю ў майстэрні свайго бацькі, а пазней — у Віленскай Школе малюнка. У 1907–1909 гадах навучалася жывапісу ў Парыжы, дзе займалася пад кіраўніцтвам вядомай мастачкі Вольгі Базнаньскай. Вярнуўшыся на Радзіму, працавала настаўніцай малявання ў Вільні, а пасля Другой сусветнай вайны пераехала ў Люблін.
⛄️Праславілася жанравымі творамі, партрэтамі і рэлігійным жывапісам. Асаблівае месца ў яе творчасці займаюць архітэктурныя інтэр’еры, у тым ліку карціна, напісаная ў 1913 годзе «Помнік Тызенгаўзу ў фарным касцёле ў Гродне», нядаўна была выстаўленая на польскім аўкцыёне за €3,5 тыс.
🦌 Найбольш вядомы твор мастачкі на Гродзеншчыне — абраз «Святы Губерт», напісаны ў 1934 годзе для касцёла Унебаўзяцця Найсвяцейшай Дзевы Марыі ў Новым Двары (сёння Шчучынскі раён Гродзенскай вобласці). Абраз перадае містычны момант сустрэчы Святога Губерта з аленем, між рагоў якога ззяе залаты крыж.
🤩 Акрамя рэлігійных твораў, Луцыя Балзукевіч пакінула некалькі жанравых карцін, пейзажаў і партрэтаў, якія захоўваюцца ў музеях Варшавы, Вільні і Коўне. Яе работы сведчаць пра вытанчаны мастацкі густ і талент.
🤩 Луцыя Балзукевіч — мастачка, чыя творчасць адлюстроўвае спалучэнне духоўных пошукаў і мастацкіх эксперыментаў свайго часу.
Чытайце таксама:
Карціну з Гродна, напісаную 111 гадоў таму, прадавалі на аўкцыёне за € 3,5 тыс.
