Радий Хәбиров “Ижади индустрияларҙың тәүге сәғәте”н үткәрҙе

21 майҙа Республика йортонда Башҡортостан Башлығы Радий Хәбиров “Креатив индустриялар сәғәте” форматында тәүге тематик кәңәшмә үткәрҙе. Унда республика Хөкүмәте ағзалары, министрлыҡ һәм ведомство етәкселәре, шулай уҡ муниципалитет вәкилдәре һәм эшҡыуарҙар ҡатнашты. Улар ижади башланғыстарға ярҙам итеүҙең төбәк структураһын формалаштырыу мәсьәләләрен тикшерҙе. Хәтерегеҙгә төшөрәбеҙ, был йәһәттән системалы эш Стратегик башланғыстар агентлығы әҙерләгән креатив индустрияларҙы үҫтереүҙең төбәк стандартын индереү сиктәрендә ойошторола. 2025 йылдың апрелендә Башҡортостан Башлығы Креатив индустрияларҙы үҫтереү буйынса республика советы ултырышын үткәрҙе, унда тармаҡ алдында торған өҫтөнлөклө бурыстар билдәләнде. Республика етәксеһе ижади проекттарға ярҙам итеүгә комплекслы ҡараш кәрәклеген билдәләне. – Беҙҙең бурыс – республикала ижади берләшмә менән үҙ-ара хеҙмәттәшлек итеү, шулай уҡ проекттарҙы оҙатыу механизмын булдырыу, – тине Радий Хәбиров. – Шулай уҡ көнүҙәк ярҙам сараларын системалаштырыу мөһим. Беренсе вице-премьер – Башҡортостандың иҡтисади үҫеш һәм инвестиция сәйәсәте буйынса министры Рөстәм Моратов хәбәр итеүенсә, Креатив индустрияларҙы үҫтереү буйынса совет ултырышы йомғаҡтары буйынса йөкләмәләр исемлеге төҙөлгән һәм уларҙы үтәүгә тотонған. Һүҙ, атап әйткәндә, тармаҡты көйләү өсөн норматив-хоҡуҡи база әҙерләү тураһында бара. Төбәктең Дәүләт Йыйылышы – Ҡоролтайҙа “Башҡортостан Республикаһында креатив индустрияларҙы үҫтереү тураһында” закон проекты ҡарала. Бынан тыш, Иҡтисади үҫеш министрлығы дәүләт ярҙамы сараларын күрһәтеү буйынса системалы эш өсөн проект инициаторҙары менән үҙ-ара эш итеү тәртибен әҙерләй. Уны инвестиция башланғыстарын оҙатыу менән оҡшаш итеп төҙөү күҙаллана. Шуныһы мөһим, бындай ярҙамды алыу хоҡуғына креатив индустрия субъекттары реестрына ингән ойошмалар ғына эйә буласаҡ. Улар тәҡдимдәрен “Ижади индустриялар сәғәте”дә тәҡдим итә аласаҡ. Проекттар хупланған осраҡта өҫтөнлөклө статус аласаҡ. Ярҙам саралары иҫәбендә Рөстәм Моратов гранттарҙы, субсидияларҙы, һалым ташламаларын, консультация оҙатыуын, шулай уҡ сауҙаһыҙ ер участкаларын ҡуртымға алыу мөмкинлеген билдәләне. Ижади индустрия вәкилдәре менән үҙ-ара эш итеүҙе муниципаль кимәлдә лә үҫтерәсәктәр. Был хаҡта Башҡортостандың иҡтисади үҫеш һәм инвестиция сәйәсәте министры урынбаҫары Светлана Верещагина һөйләне. Беренсе этапта республика Башлығы ҡушыуы буйынса пилот биләмәләре билдәләнде. Улар – Өфө, Ағиҙел, Сибай, Стәрлетамаҡ, шулай уҡ Белорет, Бөрө һәм Шишмә райондары. Радий Хәбиров муниципалитеттарға эш планын әҙерләргә, ижади секторға ҡараған ойошмалар һәм эшҡыуарҙар даирәһен билдәләргә ҡушты. Урындағы кимәлдә проект авторҙары менән үҙ-ара эш итеүҙе бизнес-шәрифтәр күҙәтәсәк. Ә башланғыстарҙы райондың “Ижади сәғәттәрендә” тикшерә башлайҙар. Шул уҡ ваҡытта төбәк етәксеһе муниципалитет башлыҡтарының шәхси йәлеп ителеүенең мөһимлеген һыҙыҡ өҫтөнә алды. – Ижади берләшмә менән тура бәйләнеш булдырырға кәрәк. Республика кимәлендә был темаға шәхсән үҙем яуап бирәм. Шулай уҡ ҡала һәм район башлыҡтары үҙ кимәлендә ижади индустрия менән шөғөлләнергә тейеш. Беҙ төҙөгән система муниципалитеттарҙың әүҙем ҡатнашлығында ғына һөҙөмтәле буласаҡ. Кәңәшмәлә шулай уҡ ижади индустрияларҙы популярлаштырыу мәсьәләләре тикшерелде. “Башҡортостан” телерадиокомпанияһының генераль директоры Рөстәм Зәрәфетдинов Башҡортостан юлдаш телеканалында ижади башланғыстарға арналған яңы телевизион проект концепцияһын тәҡдим итте, – тине Радий Хәбиров. Фото: Олег Яровиков.