🇮🇱 21 траўня 1963 года ўраджэнец Гродзеншчыны Залман Шазар заступіў на пасаду прэзідэнта Ізраіля.
Як калісьці жартавалі, але было не смешна, у Беларусі нарадзілася болей прэзідэнтаў Ізраіля, чым прэзідэнтаў Беларусі.
Сярод іх, вядома, і 3-і прэзідэнт Ізраіля Залман Шнэўр Шазар (Рубашоў) нарадзіўся 24 лістапада 1889 года ў мястэчку 🦅 Мір (сёння 🪻 Карэліцкі раён Гродзенскай вобласці) у сям'і, традыцыйна звязанай з рухам Хабад, які ставіў перад сабой мэту вяртання ў Палестыну і стварэння там габрэйскай дзяржавы.
У 1892 г. сям'я Шазара пераехала ў Стоўбцы.
Падчас рэвалюцыі 1905 — 1907 гг. удзельнічаў у арганізацыі габрэйскай самаабароны ў Беларусі і ва Украіне. На падпольным з'ездзе Паалей Цыён у Мінску ў 1906 годзе пазнаёміўся з Бэн-Цві, які прыцягнуў Шазара да ўдзелу ў выдавецкай дзейнасці руху.
У Вільні пазнаёміўся са сваёй будучай жонкай Рахель Янаіт. У гэты перыяд Шазар займаўся перакладамі з рускай на ідыш.
У 1916 Шазар быў сярод заснавальнікаў сіянісцкага працоўнага руху ў Германіі. Быў абраны ў Камісію па вывучэнні эканамічнага становішча ў Палесціне і распрацоўцы плану развіцця гаспадаркі краіны на кааператыўнай аснове.
У 1924 годзе Шазар перасяліўся ў Эрэц-Ізраэль. У 1949-м быў абраны ў Кнэсет 1-га склікання. У 1949-1951 гг. займаў пост міністра адукацыі і культуры; па яго ініцыятыве быў прыняты закон пра абавязковую школьную адукацыю.
У 1963 годзе абраны прэзідэнтам Ізраіля.
Шазар пакінуў значную літаратурную спадчыну, уключаючы прозу, паэзію, публіцыстыку і навуковыя працы. Яго зборнік аўтабіяграфічных нарысаў «Кахвей бакер» быў перакладзены на некалькі моў, а зборнік «Ар ішым» прысвечаны лідарам сіянісцкага руху. Ён перакладаў вершы Рахелі на ідыш, вывучаў сабатыянства і франкізм, а таксама быў адным з піянераў біблеістыкі на іўрыце. Шазар унёс значны ўклад у вывучэнне гісторыі мовы ідыш.
Памёр 5 кастрычніка 1974 года ў Іерусаліме.
