Был парк өфөләр өсөн мөһим урын

7 майҙа Башҡортостандың Йәмәғәт палатаһы ултырышында республика Башлығы Радий Хәбировтың ҡушыуы буйынса В.И. Ленин исемендәге паркты төҙөкләндереү буйынса йәмәғәт күҙәтеүенең ваҡытлыса эшсе төркөмө составы раҫланды. Паркты реконструкциялау буйынса эштәр барышын әҙерлек эштәре башланғандан алып объектты файҙаланыуға тапшырғанға тиклем йәмәғәтселәр, тарихсылар, тыуған яҡты өйрәнеүселәр, дәүләт власы органдары вәкилдәре туранан-тура баһалаясаҡ. Эшсе төркөм етәксеһе итеп Башҡортостандың Йәмәғәт палатаһы рәйесе Данияр Абдрахманов раҫланды. Тәүге ултырышын улар 13 майҙа үткәрә: тәүҙә парк биләмәһендә үтәсәк, һуңынан подрядсыларҙы саҡырып, үҙ тәҡдимдәрен тикшерәсәк. Төркөм ағзаларының иғтибар үҙәгендә: 1) төҙөлөш-монтаж эштәренең сифаты; 2) тәбиғи ландшафтты эргономик файҙаланыу; 3) мәҙәни үҫемлектәр, яҡтыртыу, видеокүҙәтеү, япмалар, пандустар, функциональ майҙансыҡтар, инеү төркөмдәре, бәләкәй архитектура формаларын урынлаштырыуҙа бөтә ҡағиҙәләрҙе үтәү; 4) парк биләмәһендә дәүләт һаҡлауы предметы булған төбәк әһәмиәтендәге бөтә мәҙәни мираҫ объекттарын тәүге ҡиәфәтендә һаҡлау. – Парк сәнғәтендә мемориаль парктар кеүек йүнәлеш бар. Мәҫәлән, Санкт-Петербургта Марс яланы, Мәскәүҙә Александровский баҡсаһы. Өфөлә – Ленин исемендәге парк, ул революцияға тиклем булдырылһа ла, республиканы модернизациялауҙың совет проектына арналған. Бында Мәжит Ғафури, революционерҙар ҡәберҙәре, Матросов һәм республиканың беренсе президенты Мортаза Рәхимов һәйкәле урынлашҡан, ул заводтарҙың совет етәкселәренән сыҡҡан. Шуға күрә парк үҙ йүнәлешен һаҡлап ҡалырға тейеш, тип иҫәпләйбеҙ. Шулай уҡ бәҙрәф эшләргә кәрәк, – тип билдәләне ваҡытлыса эшсе төркөм ағзаһы, тарихсы, БР Йәмәғәт палатаһы рәйесе урынбаҫары, РФ Йәмәғәт палатаһы ағзаһы Рәмил Рәхимов. “Владимир Ильич Ленин исемендәге парк – өфөләр өсөн мөһим урын. Бында, мегаполиста булғанда, үҙең менән генә тынлыҡта булырға мөмкин. Быуаттар буйына үҫкән йүкәләр һәм иҫке ҡарағайҙар күләгәһендә йөрөргә, Өфө тарихына ҡағылырға мөмкин. Баш ҡала ҡунаҡтары шау-шыулы ҡала үҙәгендәге был тыныслыҡ утрауына һоҡлана. 1824 йылда ҡалабыҙҙа булған император Александр I : “Яңыһын төҙөгәс, иҫкеһен һаҡлап ҡалыр инегеҙ! - тине. Өфөләр паркты реконструкциялағанда уның йөҙө һаҡланыр тип өмөтләнә: фонтандар яңынан эшләй башлар, һәйкәлдәр реставрацияланыр”, – тине экскурсоводтар, гид-тәржемәселәр, Инструктор-оҙатыусылар ассоциацияһы рәйесе, ваҡытлыса эшсе төркөм ағзаһы Светлана Глушкова. Фото: Башҡортостандың Йәмәғәт палатаһынан.