🪖 На БТ паказалі інтэрв’ю з палітзняволеным палякам з Гродна Ежы Жывалеўскім
На інтэрв'ю звярнула ўвагу @nashaniva
Дзяржаўны тэлеканал «Першы інфармацыйны» апублікаваў інтэрв’ю з гродзенцам і грамадзянінам Польшчы Ежы Жывалеўскім, які адбывае пакаранне ў беларускай калоніі.
У 2023 годзе Жывалеўскага асудзілі на 4 гады за нібыта шпіянаж. Паводле абвінавачання, ён перадаваў звесткі пра беларускіх вайскоўцаў і памежнікаў польскай разведцы. Да заканчэння тэрміну яму засталося пяць месяцаў.
Паводле слоў Жывалеўскага, ён жыве ў Гродне, мае жонку і 17-гадовага сына. Апошні раз бачыў сям’ю ў лістападзе 2024 года. Яго маці, якой 93 гады, жыве ў Польшчы і, па словах самога асуджанага, не ведае, што сын у зняволенні. Раней разам з жонкай Жывалеўскі трымаў некалькі крамаў на рынку, але цяпер бізнес спынены.
Ён распавёў пра будні ў калоніі: праца на швейнай вытворчасці ў дзве змены і штодзённая руціна. Таксама адзначыў, што хацеў бы застацца ў Беларусі пасля вызвалення, але, хутчэй за ўсё, яго дэпартуюць у Польшчу. Пасля гэтага ён плануе паехаць у Нідэрланды, дзе мае сяброў і прапанову працы. У апошнія месяцы зняволення ён збіраецца падаць заяву на дазвол застацца ў Беларусі яшчэ на некалькі дзён і паспрабаваць атрымаць дазвол на жыхарства.
Жывалеўскі прызнаўся, што спадзяваўся на дапамогу з польскага боку, але цяпер кажа: «Можа, Польшча і не кінула мяне, але я не ведаю, што яны зрабілі ў маёй справе».
Нагадаем, 5 сакавіка дзяржаўнае тэлебачанне паказала падобнае інтэрв’ю з іншым асуджаным палякам — Томашам Бярозам, які прасіў польскія ўлады дапамагчы яму вярнуцца дадому.
