Йәмәғәт палатаһы кәңәшмәһе булды

Бөгөн Башҡортостан Йәмәғәт палатаһының видеобәйләнеш режимында киңәйтелгән кәңәшмәһе булды. Сарала 2024 йылда Башҡортостан Республикаһында гражданлыҡ йәмғиәте тураһында доклад тыңланды. IV “Атай ҡаһарманлығы” йәмәғәт наградаһына республика конкурсына ғаризаларҙы ҡабул итеү, быйылғы беренсе кварталға палата комиссияһы эшмәкәрлеге, Йәмәғәт советының республиканың Мәҙәниәт министрлығы, Шишмә районы менән эшмәкәрлеге, киләһе кварталға пландар тураһында һөйләшеү булды. Сараны Башҡортостан Йәмәғәт палатаһы рәйесе Данияр Абдрахманов алып барҙы. Уның сығышында гражданлыҡ йәмғиәтенең былтырғы үҫеш тенденциялары билдәләнде һәм анализланды. Былтыр республиканың Йәмәғәт палатаһына дүрт меңдән ашыу мөрәжәғәт булған. Төрлө мәсьәләләр буйынса мөрәжәғәт иткәндәр. Мәҫәлән, Өфөләге Комсомол урамында торба алмаштырыу тураһында мөрәжәғәт булған. Быйыл йыл башында эштәр башланған. Үҫеп килеүсе быуынды лайыҡлы тәрбиәләгән, ғаилә ҡиммәттәрен һаҡлаған, йолаларыбыҙҙы тергеҙгән, шулай уҡ йәмәғәт тормошонда әүҙем ҡатнашҡан өсөн йәмәғәт наградаһын Башҡортостанда алтынсы тапҡыр тапшыралар. Конкурс тураһында положениела конкурс ғаризаларын баһалауҙың өс критерийы билдәләнгән: конкурста ҡатнашыусының балалар тәрбиәләүгә индергән өлөшө, йәмәғәт, ирекмәнлек эшмәкәрлегенә, уның профессиональ, хеҙмәт эшмәкәрлегендәге ҡаҙаныштарына индергән өлөшө, ғаилә ҡиммәттәрен үҫтереүгә өлөшө. Конкурс комиссияһы рәйесе Алина Сәлимованың хәбәр итеүенсә, конкурсҡа ғаризаларҙы ҡабул итеү ваҡыты 31 майға тиклем оҙайтылған. Быйылдан заявканы электрон рәүештә тапшырырға мөмкин. Конкурста ҡатнашыусыларға һылтанма буйынса анкета-ғариза тултырырға кәрәк: https://forms.yandex.ru/u/67d3db6d4936394292a18f37 Конкурс шарттары тураһында тулыраҡ мәғлүмәтте Йәмәғәт палатаһы сайтында уҡырға мөмкин. Әйткәндәй, былтыр “Атай ҡаһарманлығы” наградаһына лайыҡ булыусылар араһында Бүздәк районынан Айҙар Ғәзиев бар. Ғаиләгә тәрбиәгә 30 баланы алғандар. Башҡортостан Йәмәғәт рәйесе урынбаҫары комиссияның граждандар хоҡуҡтары, граждандар йәмғиәте институты үҫеше һәм башҡалар тураһында һөйләне. Был йәһәттән 85 мөрәжәғәт булған. Йәмәғәт палатаһы рәйесе урынбаҫары Булат Сафин, Инновация үҫеше, бәләкәй һәм урта эшҡыуарлыҡ мәсьәләләре, йүнселлек һәм тирә-яҡ мөхитте һаҡлау комиссияһы рәйесе Ынйы Әхмәҙуллина, Инфраструктура һәм биләмә үҫеше, хәүефһеҙлек мәсьәләләре, торлаҡ-коммуналь хужалыҡ, транспорт һәм юл хужалығы комиссияһы рәйесе Александр Волков һәм башҡалар сығыш яһаны. Автор фотолары.