🤱 7 траўня — свята Жыровіцкай іконы Божай Маці
Жыровіцкая ікона ўваходзіць у лік 100 найважнейшых праваслаўных і грэка-каталіцкіх абразоў свету. Гэта — самая маленькая з ушанаваных ікон Багародзіцы.
Паводле падання, ікона аб’явілася ў 1470 годзе ў лесе каля вёскі 😇Жыровічы (цяпер 🐘 Слонімскі раён Гродзенскай вобласці), што належыў шляхцічу і скарбніку ВКЛ Аляксандру Солтану. Пастухі заўважылі яркае святло на галінах грушы, што расла над крыніцай. На дрэве яны ўбачылі зіхоткую ікону Маці Божай і занеслі яе Солтану. Той загадаў збудаваць драўляную каплічку, а Жыровічы хутка сталі месцам паломніцтва.
Праз некалькі дзесяцігоддзяў святыня згарэла, а абраз знік. Святары, што прыйшлі на месца, знайшлі на камені некранутую ікону, перад якой гарэла свечка.
У 1613 годзе тагачасны ўладальнік Жыровіч Ян Мялешка збудаваў у мястэчку мураваную царкву і кляштар, куды запрасіў базыліян. Першым прыёрам кляштара стаў Іасафат Кунцэвіч.
🤩 19 верасня 1730 года Жыровіцкая ікона была ўрачыста каранавана папскімі каронамі. Залатыя кароны з каштоўнымі камянямі ахвяравала княгіня Ганна Сангушка.
Праславіліся тры выявы іконы: арыгінал з Жыровіч, фрэска ў рымскай царкве Св. Сяргея і Вакха, а таксама мастацкая копія фрэскі, якая цяпер знаходзіцца ў слонімскім касцёле Святога Андрэя.
У 1839 годзе царскім указам святыня з абразом была перададзена праваслаўнай царкве.
