Ҡыйыу ҡатын-ҡыҙҙар беҙҙең арала

Республикала йәшәгән 81 ҡатын 2024 йылда старт алған “Беренсе тирмә” төбәк проектында ҡатнашты. Ҡатын-ҡыҙҙар Луганск Халыҡ Республикаһы госпиталдәрендә эшләй. Был хаҡта Башҡортостан Башлығы Радий Хәбиров уҙғарған аҙналыҡ оператив кәңәшмәлә төбәктең эшҡыуарлыҡ һәм туризм министры Зөһрә Гордиенко хәбәр итте. Хәтерегеҙгә төшөрәбеҙ, төбәк етәксеһе ирекмәндәрҙең яралы яугирҙәрҙе ҡарау өсөн ЛХР госпиталдәренә күсмә төркөмдәр ойоштороу тураһындағы башланғысын хупланы. Ә 2024 йылдың ноябрендә Радий Хәбиров ирекле отрядта ҡатнашыусыларҙың беренсе төркөмө менән осрашты. Ирекмәндәрҙең бурыстарына палаталарҙа дежурлыҡ итеү, пациенттарҙы процедураларға һәм тышта йөрөүгә оҙатыу, уларға ашауҙа һәм дарыуҙар ҡабул итеүҙә ярҙам итеү инә. Улар шулай уҡ медицина хеҙмәткәрҙәренә бәйләүҙәрҙә һәм яугирҙәрҙе операцияға әҙерләүҙә ярҙам итә. –“Беренсе тирмә” республиканың 28 муниципалитетынан табиптарҙы һәм уҡытыусыларҙы, дәүләт һәм муниципаль хеҙмәткәрҙәрҙе, идарасыларҙы һәм журналистарҙы, эшҡыуарҙарҙы берләштерҙе. Шуны билдәләп үтәм: проектта ҡатнашыусыларҙың яртыһы тиерлек МХО яугирҙәренең туғандары. Инициативаны тормошҡа ашырыу осоронда 13 төркөм сыға, һәр командировканың оҙайлығы 17 көн тәшкил итә. Проектта ҡатнашырға теләүселәрҙең 300 анкетаһынан база булдырҙыҡ та инде, – тип хәбәр итте Зөһрә Гордиенко. - Беҙҙең ирекмәндәр госпиталдең медицина һәм санитар хеҙмәткәрҙәренең бурыстарының бер өлөшөн үҙ өҫтөнә алды, был уларға ҡатмарлыраҡ осраҡтарға иғтибарҙы тупларға мөмкинлек бирҙе. Юлға сығыр алдынан ҡатын-ҡыҙҙар Өфө медицина колледжы базаһында ойошторолған “Ҡыҙыл”, “һары” һәм “йәшел” “зоналарҙа” эвакуация этабында яралыға тәүге ярҙам һәм стабилләштереү” программаһы буйынса бушлай уҡый. Башҡортостан Башлығы Зөһрә Гордиенкоға “Беренсе тирмә” проектын ойоштороуҙа ярҙам иткәне өсөн рәхмәт белдерҙе. – Ул Башҡортостандың героик йылъяҙмаһына инәсәк. Ҡыҙҙарыбыҙ һәм ҡатын-ҡыҙҙарыбыҙ үҙҙәре берләшеп, күңел саҡырыуы буйынса ирекмән булып китте. Уларға мотлаҡ рәхмәт әйтербеҙ, – тип билдәләне Радий Хәбиров. – Проектта ҡатнашыусылар менән осрашҡанда улар үҙҙәренең эше тураһында һөйләне – ул физик яҡтан да, эмоциональ яҡтан да бик ауыр. Был ҙур хеҙмәт, һәм беҙ һәр ваҡыт уларға ярҙам итергә әҙербеҙ. Фото: Башҡортостан Башлығы сайты.